Лицензийн гэрээ дууссанаар хоёр том хит нэг сарын дотор алга болно
Нэтфликс сар бүр шинэ кино, цувралаар сангаа өргөжүүлдэг ч үүний зэрэгцээ олон бүтээлийг чимээгүйхэн платформоосоо хасдаг. 2026 оны нэгдүгээр сард Их Британийн Netflix сангаас хоёр томоохон контент хасагдах гэж буй нь хэрэглэгчдийн дургүйцэл, шүүмжлэлийг хурцаар өдөөж байна. Энэ сард платформоос хасагдахаар болсон бүтээлүүд нь дэлхий даяар олон сая үзэгчтэй “Friends” ситком болон шүүмжлэгчдээс өндөр үнэлгээ авсан “Mad Men” цуврал юм.
Netflix UK дээр “Friends” олон жилийн турш хамгийн тогтвортой өндөр үзэлттэй, дахин дахин үзэгддэг цувралын нэг байсаар ирсэн. Гэвч лицензийн гэрээний хугацаа дууссантай холбоотойгоор тус бүтээлийг Их Британийн Нэтфликсийн сангаас бүрэн хасахаар төлөвлөжээ. Алдарт найзуудын тухай энэ ситком 2018 онд Netflix UK-д орж ирснээсээ хойш олон үзэгчийн хувьд платформыг сонгох гол шалтгаануудын нэг болсон гэж үздэг.
“Harry Potter” ч мөн Нэтфликсээс явна
Нэгэнт зөвхөн классик цуврал ситкомуудаар хязгаарлагдсангүй, “Harry Potter” цуврал кинонууд ч мөн Нэтфликсийн сангаас гарахаар болсон тухай мэдээлэл давхар гарчээ. Энэ өөрчлөлт нь Европын зах зээлд HBO Max нэвтрэхтэй давхцаж байгаа нь анхаарал татаж байна. Шинэ стриминг үйлчилгээ нь Warner Bros-ийн бүх гол контентын үндсэн “гэр” болохоор тооцогдож байгаа тул тус студийн бүтээлүүд аажмаар бусад платформоос шахагдан гарах хандлагатай байна.
Их Британид HBO Max-ийг 2026 оны гуравдугаар сард албан ёсоор ажиллуулж эхлэхээр төлөвлөсөн бөгөөд нээгдсэн даруйдаа “Friends” болон “Harry Potter” зэрэг нэр хүндтэй франчайз, олон ангит цувралуудыг өөр дээрээ төвлөрүүлэх аж. Үүний улмаас Нэтфликсийг урт хугацаанд сонгон ашиглаж ирсэн үзэгчид дуртай бүтээлээ цаашид хаана, хэрхэн хүлээн авах талаар дахин бодож, зах зээлийн шинэ өрсөлдөөн, “контентын дайнд” албан ёсоор орж байгаагийн нэг илэрхий дохио болж байна.
