Улаан хивсний зургууд жүжигчдийн хоорондын хөндий харилцааны тухай яриаг дахин өдөөв
Лос-Анжелес хотод “Эйфория” цувралын гуравдугаар улирлын нээлт болж, гол дүрийн жүжигчид улаан хивсний ёслолд оролцлоо. Жүжигчдийн бүрэлдэхүүн олны өмнө гарч хамтдаа зургаа авхуулсан ч нийтлэгдсэн зургуудаас харахад Зендая цувралын хамтрагч Сидни Суинитэй хамт авхуулах зургаас татгалзсан нь анхаарал татав.
Энэ мөчийг олон хүн тэдний хооронд удаан хугацаанд яригдаж ирсэн таагүй харилцаатай холбон тайлбарлаж байна. Өмнө нь барууны хэвлэлүүд Зендая Сидни Суинитэй санаатайгаар зай барьдаг тухай хэдэнтээ бичиж байсан бөгөөд гол шалтгааныг нь Суинигийн улс төрийн байр суурь, мөн түүний оролцсон маргаан дагуулсан сурталчилгаануудтай холбон тайлбарладаг байв. Тухайн үед ийм яриаг батлагдаагүй цуурхал гэж үзэж байсан ч шинэ улирлын нээлтийн дараа энэ мэдээлэл илүү бодит мэт харагдаж эхэллээ.
28 настай Зендая улаан хивсний ёслолд нуруу ил гаргасан хүрэн өнгийн торгон Ashi Studio даашинзаар гоёсон байв. Тэр төрхөө алмаазан ээмгээр гүйцээжээ. Харин 29 настай Сидни Суини Пьер Карденын 2007 оны цуглуулгын цав цагаан даашинз өмсөж, нум хэлбэрийн бүс, мөр давсан драпптай, бараг л тэнгэрийн элчийн нөмрөгийг санагдуулам төрхөөр гарч ирсэн байна.
Сидни Суинийг тойрсон улс төр, сурталчилгаа, дүр төрхийн маргаан дахин сөхөгдөв
Зендая, Сидни Суини нарын зөрчил шинэ зүйл биш гэж үздэг. Цуу яриагаар бол Зендая “Эйфория” цувралын хоёрдугаар улирлын зураг авалтын үеэс эхлэн хамтран тоглогчоосоо зайгаа барьж эхэлсэн аж. Харин Суини өөрөө хэд хэдэн удаа бусдад таалагдахын тулд өөрийн үзэл бодлыг өөрчлөхгүй гэдгээ илэрхийлж байсан.
Сидни Суиниг тойрсон шүүмжлэл ганцхан шалтгаантай биш. 2025 оны зун түүний оролцсон American Eagle жинсэн өмдний сурталчилгаа томоохон маргаан дэгдээж байв. Тухайн урианд “jeans” болон “genes” гэсэн үгийн ойролцоо дуудлагыг ашигласнаар “Сидни Суинид гайхалтай генүүд бий” гэсэн утга үүссэн байна. Үүний дараа олон нийтийн сүлжээнд энэ сурталчилгаа евгеник, цагаан арьстны давуу байдлыг өөгшүүлсэн санаа агуулсан байж магадгүй гэж шүүмжилсэн. Ялангуяа Сидни цэнхэр нүдтэй, шаргал үстэй, “нордик” төрхтэй эмэгтэй учраас уг шүүмжлэл улам хүчтэй өрнөсөн юм.
Үүн дээр нэмээд Суинигийн улс төрийн байр суурь ч түүнийг тойрсон яриаг улам хурцатгасан. Өнгөрсөн жилээс эхлэн тэр Флоридад Бүгд найрамдах намын сонгогчоор бүртгэлтэй болсон нь ил болж, энэ мэдээлэл Дональд Трампын анхаарлыг хүртэл татсан байна. Трамп түүнийг болон шүүмжлэлд өртсөн сурталчилгааг нь ил тод магтсан нь нөхцөл байдлыг бүр ч эмзэг болгожээ.
Сиднигийн олон нийтийн өмнөх төрх мөн байнга шүүмжлэл дагуулдаг. Түүнийг улаан хивсний ёслол дээр хэт задгай хувцас өмсдөг, өдөөн хатгасан зураг авалтад оролцдог гэж шүүмжилдэг ч асуудал нь зөвхөн тэр төрх биш, харин өөрийн ярьдаг байр суурьтай нь зөрчилдөж байгаа явдал гэж зарим хүн үздэг. Нэг талаас тэр өөрийг нь хэт сексжүүлж харж байгаад гомдоллодог мөртлөө нөгөө талаас улам илүү “нүцгэн” хэв маягтай төрхийг сонгосоор байна гэж шүүмжлэгчид хэлдэг.
Саяхан бүр Холливүүдийн 1950-иад оны секс бэлгэ тэмдэг Ким Новак Сидни Суини өөрийг нь намтар кинонд бүтээхийг эсэргүүцсэн тухай мэдээлэл ч гарсан. Түүний тайлбарласнаар Сидни хэтэрхий сексжүүлсэн дүр төрхтэй харагддаг аж.
Ийнхүү “Эйфория” цувралын шинэ улирлын нээлт зөвхөн улаан хивсний гоёл, оддын төрхөөр бус, жүжигчдийн харилцаа болон Сидни Суинийг тойрсон олон давхар маргааныг дахин олны анхаарлын төвд авчирлаа.
