Дэлхийн хэмжээний уран бүтээлчид хуран цугларсан олон улсын томоохон кино наадамд Монгол найруулагчдын бүтээл чансаагаа гайхуулж, тэргүүн дээд шагналыг эх орондоо авчирлаа. Болгар улсын Софи хотноо зохион байгуулагдсан “Golden Femi Film Festival”-аас найруулагч Э.Ган-Очир, “Eguur News” мэдээллийн агентлагийн эрхлэгч бөгөөд продюсер Ж.Мядагбадам нарын хамтын бүтээл болох “Их говийн манаач” (The Guardian of the Great Gobi) баримтат кино шилдгээр шалгарч, алтан цомын эзэн болсон байна. Тус наадамд дэлхийн 130 орны 950 бүтээл өрсөлдсөнөөс ийнхүү Монголын говийг өгүүлсэн уран бүтээл онцгойрч чаджээ.
Уг кино наадмын баримтат киноны төрөлд шүүгчдийн зөвлөл Монголын уран бүтээлийг дэлхийн экологийн тулгамдсан асуудлыг хөндсөн чухал бүтээл хэмээн онцолсон байна. Тэд тус бүтээлд “Алтан Мазаалай” (Golden Mazaalai of the Altai Gobi Award) шагналыг олгох болсон үндсэн амжилт, шалтгааныг ийнхүү тодорхойлжээ:
- Өндөр өрсөлдөөн: Дэлхийн 130 орны 950 бүтээл өрсөлдсөн ангилалд тэргүүлж чадсан явдал.
- Шүүгчдийн үнэлгээ: Уран бүтээлийг “Дэлхийн хамгийн ховор, говийн анхдагч экосистемийг шинжлэх ухаанчаар дуу, дүрслэлийн өндөр түвшинд харуулж, уур амьсгалын өөрчлөлтийн эсрэг дуу хоолой болсон” хэмээн өндөр түвшинд үнэлсэн.
- Байгаль хамгаалал: Говийн ховор экосистемийг дэлхий нийтэд дуу, дүрсний өндөр чанартайгаар болон шинжлэх ухааны үндэслэлтэй таниулсан.
Нүүдэлчдийн ахуй болон байгаль дэлхийн нандин холбоог харуулсан уг кино нь зөвхөн Европын тавцанд бус Азийн орнуудад ч өндөр үнэлгээ аваад байгаа юм. Энэхүү бүтээл нь энэ оны дөрөвдүгээр сард БНСУ-ын Пусан хотноо зохион байгуулагдсан “Монгол кино өдөрлөг”-ийн нээлтийн үзвэрээр тодорч, хилийн чинад дахь үзэгчдийн хүртээл болон бишрэлийг төрүүлж байсан билээ.
