40 настай дуучин Lady Gaga болон түүний сүйт залуу, 42 настай санхүүч Michael Polansky нарын анхны хүүхэд тээгч эхийн тусламжтайгаар мэндэлсэн талаар TMZ мэдээлжээ.
Тус хэвлэлийн мэдээлснээр хосын охин Rose зургадугаар сарын 9-нд төрсөн байна. Тээгч эхийн төрөлтийг Калифорнид танигдсан эмч Robert Katz удирдан авчээ.
Lady Gaga болон Michael Polansky нар яагаад тээгч эхийн аргыг сонгосон талаар одоогоор олон нийтэд дэлгэрэнгүй мэдээлээгүй байна. Харин өмнө нь дуучны ойрын хүрээллийн эх сурвалжууд Lady Gaga эрүүл мэндийн асуудлын улмаас удаан хугацаанд жирэмслэхэд хүндрэлтэй байсан тухай хэвлэлүүдэд ярьж байжээ.
Lady Gaga, Michael Polansky нар 2020 оноос хойш үерхэж байгаа юм. 2024 онд дуучин сүй тавьснаа ил болгож, Michael Polansky-тай гэр бүл болох нь тухайн үеийнхээ “хамгийн чухал зорилго” гэдгийг ярьж байсан байна.
Хос хүүхэдтэй болсон тухай мэдээлэл анх есдүгээр сарын 12-нд олон нийтэд хүрчээ. Тухайн үед папараццичдын авсан зурагт Lady Gaga нярай хүүхдээ тэвэрсэн байдалтай гудамжаар явж байсан аж.
Удалгүй TMZ хос охиноо Rose Bean Polansky гэж нэрлэсэн талаар мэдээлсэн байна.
Lady Gaga 2017 онд өөрийгөө фибромиалги өвчтэй гэж оношлуулсан тухайгаа олон нийтэд ярьж байжээ. Фибромиалги нь мэдрэлийн тогтолцоотой холбоотой, биеийн олон хэсгээр булчин, үе мөч орчимд удаан хугацааны өвдөлт үүсгэж болдог эмгэг юм.
2025 онд дуучин биеийн байдлынхаа талаар ярихдаа:
“Өвчин хяналтад байгаа. Гэхдээ зарим өдөр өвдөлт эргээд мэдрэгддэг”
хэмээн хэлж байсан байна.
Одоогоор Lady Gaga болон Michael Polansky нар тээгч эхийн тусламж авсан шалтгаан, жирэмслэлттэй холбоотой хувийн мэдээллээ дэлгэрэнгүй тайлбарлаагүй хэвээр байгаа юм.
