1990-ээд оны дэлхийн хамгийн алдартай супермоделиудын нэг Cindy Crawford-ийн хүү Presley Gerber 27 насандаа таалал төгссөнтэй холбоотой мөрдөн шалгах ажиллагаа үргэлжилж байна.
АНУ-ын Santa Monica хотын цагдаагийн газар даваа гарагт түүний үхэл хар тамхины тун хэтрүүлсэнтэй холбоотой байж болзошгүй хувилбарыг шалгаж байгаа талаар мэдээлжээ.
Los Angeles County Medical Examiner-ийн мэдээлснээр 27 настай загвар өмсөгч Presley Gerber ням гарагт нөхөн сэргээх эмчилгээний төвд нас барсан байна.
Үхлийн албан ёсны шалтгаан хараахан тогтоогдоогүй
Цагдаагийн байгууллага Presley Gerber-ийн үхлийн шалтгааныг одоогоор эцэслэн тогтоогоогүй байгаа аж.
Гэхдээ урьдчилсан байдлаар гаднын нөлөө оролцсон гэх тодорхой шинж тэмдэг илрээгүй гэж мэдээлжээ. Тиймээс хар тамхины тун хэтрүүлсэн эсэх нь одоогоор зөвхөн шалгаж буй боломжит хувилбаруудын нэг хэвээр байна.
Cindy Crawford болон түүний нөхөр Rande Gerber нарын хэвлэлийн төлөөлөгч Allie Jenkins CBS News-д:
“Гэр бүлийнхэн нь эмгэнэн гашуудаж буй энэ маш хүнд үед тэдний хувийн орон зайг хүндэтгэхийг хүсэж байна”
хэмээн мэдэгдсэн байна.
Загварын карьераа 16 настайдаа эхлүүлжээ
Presley Gerber ээж Cindy Crawford болон дүү Kaia Gerber нарынхаа адил загварын салбарт ажиллаж байв.
Тэрээр ердөө 16 настайдаа Италийн Moschino брэндийн загварын шоунд анх удаа тайзан дээр гарчээ.
Үүний дараа Burberry, Dolce & Gabbana, Bottega Veneta зэрэг олон улсын томоохон брэндүүдийн загварыг өмсөж, сурталчилгааны ажлуудад оролцсон байна.
Түүний аав Rande Gerber нь нэрт бизнесмэн бөгөөд жүжигчин George Clooney-той хамтран Casamigos текила брэндийг байгуулж байсан юм.
Сэтгэцийн эрүүл мэнд, донтолтын талаар нээлттэй ярьдаг байв
Presley Gerber сүүлийн жилүүдэд сэтгэцийн эрүүл мэндийн асуудал болон мансууруулах бодисын хэрэглээтэй холбоотой өөрийн туулсан бэрхшээлүүдийн талаар олон нийтэд илэн далангүй ярьдаг болсон байна.
2023 онд “Studio 22” подкастад оролцохдоо тэрээр:
“Би өөрөө сэтгэцийн эрүүл мэндийн асуудал, сэтгэл гутрал болон үүнтэй холбоотой бусад бэрхшээлүүдтэй тэмцэж ирсэн. Хэрэв би өөрийн туулсантай адил хүнд байдлаас нэг хүн ч бай, зуун хүн ч бай гарахад нь тусалж чадвал тэр л миний хийж чадах хамгийн чухал зүйл”
хэмээн ярьж байжээ.
Мөн энэ сарын “America Vogue” сэтгүүлд Kaia Gerber ахынхаа донтолттой тэмцэж байсан үеийн талаар ярьсан байна.
Kaia Gerber-тай маш ойр дотно байсан
Presley Gerber гэр бүлийнхэнтэйгээ, ялангуяа дүү Kaia Gerber-тай ойр харилцаатай гэдгээ өмнө нь олон удаа ярьж байжээ.
Ах, дүү хоёр 2018 онд Calvin Klein брэндийн сурталчилгаанд хамт оролцож байсан бөгөөд Presley Gerber дүү Kaia-ийнхаа нэрийг гар дээрээ шивүүлсэн байв.
Мөн тэрээр 2018 оны Super Bowl-ийн үеэр цацагдсан Pepsi-ийн сурталчилгаанд ээж Cindy Crawford-ийн хамт тогложээ.
Cindy Crawford өөрөө 1992 онд Pepsi-ийн алдарт сурталчилгаанд оролцож байсан тул 26 жилийн дараа хүүтэйгээ хамтарсан нь тухайн үед олны анхаарлыг татаж байсан юм.
Cindy Crawford хүүдээ долоодугаар сард төрсөн өдрийн мэнд хүргэж байжээ
Энэ оны долоодугаар сард Presley Gerber 27 нас хүрэхэд Cindy Crawford хүүгийнхээ бага насны хоёр архивын зургийг Instagram хуудсандаа нийтэлж, төрсөн өдрийн мэндчилгээ дэвшүүлсэн байна.
Харин одоо Presley Gerber-ийн үхлийн нөхцөл байдлыг холбогдох байгууллагууд үргэлжлүүлэн шалгаж байгаа бөгөөд албан ёсны шалтгаан одоогоор тогтоогдоогүй хэвээр байна.
Эх сурвалж: BBC
