Нийслэлийн цэцэрлэгийн 100 багшийг “Хэл ярианы бэрхшээлтэй хүүхэдтэй ажиллах, хэл заслын анхан шатны мэдлэг, чадвар олгох” сургалтад хамруулж байна. Сургуулийн өмнөх насанд хүүхдийн хэл яриа, авиан дуудлага эрчимтэй хөгждөг тул энэ үед илэрсэн алдааг эрт таньж, зөв арга зүйгээр дэмжих нь чухал юм.
Сургалтын хүрээнд сургуулийн өмнөх боловсролын багш нарт хүүхдийн авиан дуудлагын хөгжлийг дэмжих, зөв дуудлагыг төлөвшүүлэх арга зүй эзэмшүүлж байна. Мөн өдөр тутмын сургалт, үйл ажиллагаандаа хэрэгжүүлэх практик мэдлэг, ур чадвар олгохыг зорьжээ.
Сургалтын гол ач холбогдол:
- хэл ярианы бэрхшээлтэй хүүхдийг эрт илрүүлэх;
- авиан дуудлагын хөгжлийг зөв дэмжих;
- цэцэрлэгийн орчинд хэл заслын анхан шатны арга зүй хэрэгжүүлэх;
- хүүхдийн суралцах чадвар, харилцааны хөгжлийг дэмжих.
Цэцэрлэгийн багш нар хүүхэдтэй өдөр бүр ажилладаг тул авиан дуудлагын хөгжлийг дэмжих үйл ажиллагааг зөв зохион байгуулах боломжтой. Ингэснээр хэл ярианы бэрхшээлтэй хүүхдэд шаардлагатай дэмжлэгийг цаг алдалгүй үзүүлэх нөхцөл бүрдэх юм.
Хүүхдийн хэл ярианы хөгжлийг сургуулийн өмнөх наснаас нь дэмжих нь цаашдын суралцах чадвар, нийгмийн харилцаанд эерэг нөлөөтэй гэж үзэж байна. Иймээс багш нарыг хэл заслын анхан шатны мэдлэг, арга зүйд сургах нь боловсролын орчин дахь эрт илрүүлэлт, дэмжлэгийн чухал алхам болж байна.
