Lisa Kudrow домогт цувралын дараах орлогын талаар ярьжээ
“Friends” цувралын Phoebe Buffay-ийн дүрээр дэлхий дахинд танигдсан жүжигчин Lisa Kudrow алдарт sitcom дууссанаас хойш хорь гаруй жил өнгөрсөн ч гол дүрийн жүжигчид одоо хүртэл их хэмжээний орлого олсоор байдгийг ил болгожээ.
Эмми шагналт жүжигчин “The Times of London” сонинд өгсөн ярилцлагадаа “Friends” цувралаас өөрөө болон хамтран тоглосон жүжигчид нь жил бүрийн дахин ашиглалтын орлогоос 20 сая ам.доллар хүртдэг талаар дурссан байна.
1994-2004 оны хооронд нийт арван улирлын турш өвөрмөц, хөгжилтэй Phoebe Buffay-ийн дүрийг бүтээсэн Kudrow мөн 2023 онд 54 насандаа таалал төгссөн хамтран тоглогч Matthew Perry-ийн эмгэнэлт үхлийн дараа NBC сувгаар гарч байсан уг цувралыг дахин үзсэн тухайгаа ярьжээ.
Matthew Perry-ийн нас барсны дараа цувралыг өөрөөр харжээ
62 настай жүжигчин энэ тухайгаа: “Matthew нас барсны дараа би цувралыг дахин үзсэн. Өмнө нь би зөвхөн өөрийн алдаа, эсвэл юуг илүү сайн хийж болох байсан талаар л хардаг байлаа. Харин анх удаа би энэ цуврал үнэхээр ямар гайхалтай байсныг үнэлсэн” гэж хуваалцжээ.
Тэрээр цааш нь: “Учир нь тэнд суут ухаан ажиллаж байсан. Бидний хэн нь ч цаашид юу ч хийсэн, ийм зүйлийг дахин мэдрэхгүй” хэмээн хэлсэн байна.
Kudrow өөрийгөө Phoebe-ийн дүрд “сайн тоглосон” гэж үздэг ч Rachel Green болон Monica Geller-ийн дүрийг бүтээсэн Jennifer Aniston, Courteney Cox нарын тоглолтыг “гайхалтай” хэмээн магтжээ.
Мөн Ross Geller-ийн дүрд David Schwimmer, Joey Tribbiani-ийн дүрд Matt LeBlanc нарын инээдмийн мэдрэмжтэй тоглолтыг өндрөөр үнэлсэн байна. Гэсэн ч тэрээр Chandler Bing-ийн ухаалаг, ёжтой дүрээрээ Matthew Perry “бүгдийг давж гардаг байсан” гэж хүлээн зөвшөөрчээ.
Тайзны ард маргаан байсныг ч нуусангүй
Kudrow-ийн хэлснээр, “Friends” цуврал нь залуу үеийнхэнд тэр бүр мэдрээгүй байж болох “нэгэн төрлийн гэнэн цайлган уур амьсгалыг” харуулдаг байсан ч тайзны ард бүх зүйл төгс байгаагүй аж.
Тэрээр цувралын ард “муу зүйлс ч тодорхой хэмжээгээр болж байсан” гэдгийг хэлсэн байна.
Хэдийгээр гол зургаан жүжигчин бодит амьдрал дээр ч найзууд байсан бөгөөд тэдний цалин эхний улиралд нэг ангид 22,500 ам.доллар байсан бол ес, аравдугаар улиралд нэг ангид 1 сая ам.доллар хүртэл өссөн ч тэд цувралын зохиолчидтой байнга санал зөрөлддөг байжээ.
Ийнхүү Lisa Kudrow “Friends”-ийн ард байсан асар их орлого, жүжигчдийн амжилт, Matthew Perry-ийн онцгой авьяас болон тайзны ар дахь зөрчил маргааны талаар илэн далангүй ярьсан нь алдарт цувралын фенүүдийн анхаарлыг дахин татлаа.
