Рэпер Swings түүхэн жанрын бүтээлд анх удаа хүч сорих гэж байна. Тэрээр энэ сард нээлтээ хийх “Woman of Crown Prince Gwanan” буюу “Mad Gaze: Woman of the Crown Prince” нэртэй богино хэмжээний түүхэн драмд тогложээ.
Swings уг төсөлд өөрийн жинхэнэ нэр Moon Ji Hoon-оор оролцож байгаа бөгөөд Nam Hyul хэмээх дүрийг бүтээсэн байна. Түүний дүр нь угсаа залгамжлах ханхүүгийн хамгийн дотнын найз төдийгүй үнэнч бие хамгаалагч юм.
Swings албан ёсны постероо өөрөө дэлгэжээ
Уран бүтээлч шинэ драмынхаа албан ёсны постерыг сошиал хуудсандаа нийтэлж, хошигносон тайлбар дагалдуулсан байна.
Тэрээр:
“Энэ бол ‘Gwanan’ богино драмын Nam Hyul. Намайг капибара гэж шоолохоо болиоч гэж хэлсэн биз дээ”
хэмээн бичжээ.
Постер дээр Swings улаан өнгийн ханбок болон уламжлалт малгай өмсөж, тун хатуу ширүүн төрхтэй харагдсан нь фэнүүдийн анхаарлыг татсан байна.
Хуурамч харилцаа, хаан ширээний тэмцлийг өгүүлнэ
“Woman of Crown Prince Gwanan” нь ордны эрх мэдлийн тэмцэл, хаан ширээний төлөөх өрсөлдөөн болон хуурамч харилцааг хослуулсан романтик түүхэн драм юм.
Үйл явдлын төвд угсаа залгамжлах ханхүү болон түүнийг хөнөөх даалгавартайгаар ордонд нууцаар илгээгдсэн алуурчин эмэгтэй хоёрын харилцаа өрнөнө.
Гол дүрүүдэд Sung Joon болон Chuu нар тогложээ. Sung Joon хүйтэн, хатуу зан чанартай ханхүү Lee Hyun-ийн дүрийг бүтээсэн бол Chuu ордны шивэгчин болж дүрээ хувиргасан хөлсний алуурчин Eun Woo-гийн дүрд тоглосон байна.
Богино хэмжээний драмын бүх анги аравдугаар сарын 22-ны 17:00 цагт Солонгосын цагаар Lezhin Snack платформоор нэгэн зэрэг цацагдах юм.
Ингэснээр рэпперээрээ танигдсан Swings энэ удаа түүхэн драмын жүжигчний дүрээр үзэгчдэд өөрийн шинэ төрхийг харуулахаар болж байна.
