IVE хамтлагийн Jang Wonyoung болон жүжигчин Kim Ji Won нарын BVLGARI брэндийн арга хэмжээний үеэрх богинохон харилцаа цахим орчинд хэлэлцүүлэг өрнүүлжээ.
Аравдугаар сарын 28-нд BVLGARI Сөүл дэх Seongeun Museum of Art-д үзэсгэлэнгийн урьдчилсан арга хэмжээ зохион байгуулсан байна. Тус арга хэмжээнд брэндийн элч Kim Ji Won, Jang Wonyoung нар BVLGARI-ийн гүйцэтгэх захирал Laura Burdese-ийн хамт оролцжээ.
Гурвуулаа хамт зургаа авахуулах үед эхэндээ Kim Ji Won, Laura Burdese, Jang Wonyoung гэсэн дарааллаар зэрэгцэн зогссон байна. Энэ үеэр Kim Ji Won тайзны гаднаас өгсөн зааврыг сонссон бололтой толгойгоо эргүүлэхэд Jang Wonyoung түүнийг дуудан, дотогшоо ойртож зогсохыг гараараа дохиолжээ.
Үүний дараа Kim Ji Won болон Laura Burdese хоёр байрлалаа түр сольсон ч удалгүй ажилтнууд өөр заавар өгч, тэд анхны байрлалдаа эргэн орсон байна.
Jang Wonyoung энэ үед бага зэрэг санаа зовсон мэт харагдаж, Laura Burdese-д хүндэтгэлтэй дохио үзүүлжээ. Харин BVLGARI-ийн гүйцэтгэх захирал ч инээмсэглэн эелдгээр хариу үзүүлсэн байна. Эцэст нь гурвуулаа инээмсэглэн зураг авалтаа үргэлжлүүлжээ.
Богинохон будлиан цахим орчинд том яриа болов
Уг мөчийн бичлэг сошиал платформуудаар тарсны дараа зарим хэрэглэгч Jang Wonyoung-ийн үйлдлийг албан ёсны арга хэмжээний хувьд зохимжгүй байсан гэж шүүмжилжээ.
Ялангуяа дэлхийн брэндийн гүйцэтгэх захиралтай хамт зогсож байсан үед байрлал солих дохиог өөрөө өгсөн мэт харагдсан нь мэргэжлийн бус гэж үзсэн хүмүүс байв.
Зарим хэрэглэгч түүний Kim Ji Won болон Laura Burdese хоёрт хандсан гарын дохио албан ёсны арга хэмжээнд хэтэрхий чөлөөтэй байсан гэж үзжээ.
Гэхдээ нөгөө талд Jang Wonyoung-ийг хамгаалсан байр суурь ч олон гарсан байна. Тэдний үзэж буйгаар тэр өөрөө байрлал зохион байгуулаагүй, харин ажилтнуудын зааврыг дагасан төдий бөгөөд богинохон будлианыг хэт дөвийлгөсөн гэжээ.
Нэг хэрэглэгч:
“Тэр өөрөө байрлалаа шийдээгүй нь тодорхой. Ажилтнууд заавар өгч байсан”
гэж бичсэн байна.
Мөн бичлэгийн турш Kim Ji Won, Laura Burdese, Jang Wonyoung нарын аль нь ч эвгүйцсэн эсвэл зөрчилтэй харагдаагүй, харин эелдэг, тайван уур амьсгалтай байсан гэдгийг онцолсон хүмүүс олон байжээ.
Ингэснээр хэдхэн секунд үргэлжилсэн байрлалын будлиан Jang Wonyoung-ийн ёс зүй, арга хэмжээний үеийн харилцааны талаар цахим маргаан үүсгэсэн ч тухайн оролцогчид өөрсдөө асуудалтай хандсан шинж ажиглагдаагүй байна.
