Өмнөд Солонгосын аяллын блогер Чо Жин Ү, цахим орчинд Jin Travel болон Jinsseurebeul нэрээр танигдсан тэрбээр Боливид зам тээврийн ослоор нас баржээ. Тэр 33 настай байсан бөгөөд дэлхийн улс орнуудаар дугуйгаар аялсан бичлэгүүдээрээ үзэгчдэд танигдсан юм.
Осол арваннэгдүгээр сарын 4-нд Боливийн Эль-Альто хотод гарсан байна. Орон нутгийн хэвлэлүүдийн мэдээлснээр Чо Жин Ү дугуйтай явж байх үедээ хүнд даацын ачааны машинд мөргүүлжээ.
Жолооч ослын газраас явсан ч хэдэн цагийн дараа баривчлагджээ
Боливийн UNITEL телевизийн мэдээлснээр осол арваннэгдүгээр сарын 4-ний өглөө болсон байна.
Ойр орчмын хүмүүс болон гэрчүүд түүнд анхны тусламж үзүүлэхийг оролдсон ч Чо Жин Ү авсан хүнд гэмтлийн улмаас түргэн тусламж ирэхээс өмнө газар дээрээ нас баржээ.
Ачааны машины жолооч ослын дараа хэргийн газраас явсан боловч цагдаа нар түүнийг хэдэн цагийн дараа саатуулсан байна.
Эль-Альто хотын тээврийн цагдаагийн төлөөлөгч, хошууч Мединагийн мэдээлснээр жолооч дугуйчныг тээврийн хэрэгслийн харагдахгүй бүсэд байсан эсвэл анхаарал алдсаны улмаас анзаараагүй гэж мэдүүлжээ.
Жолоочийн согтууруулах ундаа хэрэглэсэн эсэхийг шалгахад цусан дахь спиртийн хэмжээ 0 гарсан байна. Цагдаагийн байгууллага ослын нөхцөл байдлыг бүрэн тогтоох мөрдөн шалгах ажиллагааг үргэлжлүүлж байгаа аж.
“Дугуйгаараа дэлхийн газрын зургийг зурж явсан Чо Жин Ү биднийг орхилоо”
Блогерын нас барсан тухай мэдээллийг 66 мянга гаруй дагагчтай “Jin’s Travel” YouTube сувгийн администраторууд гэр бүлийнх нь зөвшөөрөлтэйгээр баталгаажуулжээ.
Мэдэгдэлд:
“Дугуйгаараа дэлхийн газрын зургийг зурж явсан Чо Жин Ү арваннэгдүгээр сарын 4-нд орон нутгийн цагаар Эль-Альто хотод нас барлаа”
гэжээ.
Мөн талийгаачийн шарилыг эх оронд нь хүргэх болон холбогдох ажиллагаанд тусалсан Боливи дахь БНСУ-ын Элчин сайдын яамны ажилтнуудад талархал илэрхийлсэн байна.
Түүний ойр дотныхон болон сувгийн удирдлагууд ослын талаар баталгаагүй таамаг тараахгүй байх, мөн хэргийн газрын зураг, бичлэгийг олон нийтэд түгээхээс татгалзахыг хүсжээ.
Сүүлчийн бичлэгээ долоо хоногийн өмнө нийтэлсэн байв
Чо Жин Ү Өмнөд Америкаар дугуйгаар аялсан контентоороо танигдсан бөгөөд замын туршлага, орон нутгийн амьдрал, шинэ улс орнуудтай танилцсан мөчүүдээ YouTube-ээр хуваалцдаг байжээ.
Түүний Перу дэх аяллын тухай хамгийн сүүлчийн видео ослоос ердөө долоо хоногийн өмнө нийтлэгдсэн байна.
Нас барсан тухай мэдээ гарсны дараа олон мянган үзэгч түүний YouTube суваг болон сошиал хуудсанд эмгэнэл илэрхийлж, аялах хүсэл тэмүүлэл, шинэ газар орнуудыг нээх сонирхлыг нь дурсжээ.
