Хятадын тоглоомын салбарын томоохон тоглогч Pop Mart компанийн ерөнхий захирал Ван Нин 38 насандаа тус улсын хамгийн залуу тэрбумтнаар тодорлоо. Тэрбээр одоогоор Хятадын хамгийн баян 10 эрхмийн нэг бөгөөд 21 тэрбум ам.долларын хөрөнгөтэй болжээ. Үүний гол шалтгаан бол энэ зун дэлхий нийтийг байлдан дагуулсан жижигхэн мангас — Labubu юм.
Хятадад анх үүссэн энэхүү тоглоомын брэнд Labubu энэ зун олон улсын хэмжээнд эрэлттэй бүтээгдэхүүн болж, зөвхөн өнгөрсөн жил Pop Mart компанийн орлого 188 хувиар, харин Labubu-ийн Monsters цуврал 726 хувиар өссөн байна.
Pop Mart нь 2010 онд Бээжинд байгуулагдсан бөгөөд анх гадны брэндүүдийг импортлон худалдаалдаг байсан ч удалгүй өөрийн брэндийг хөгжүүлэхээр шийдэж, хэрэглэгчдэд гэнэтийн бэлэг мэт «сохор хайрцаг» бүхий тоглоомуудыг санал болгож эхэлсэн юм.
Labubu бол охин элф. Түүнд хурц үзүүртэй чих, том нүд, есөн шүд байдаг ч сүүлгүй. Энэхүү дүрийг анх 2015 онд Гонконгийн зураач Касинг Лунг бүтээсэн бөгөөд 2019 онд Pop Mart түүний бүтээлд албан ёсны лиценз авч, бүтээгдэхүүн болгосон юм. Labubu хамгийн анх Лунгийн «Monsters» хэмээх цувралд гарч байжээ.
