Үндэсний их баяр наадмын бэлтгэл ажлыг хангах хүрээнд зохион байгуулалт, хяналтын хэд хэдэн арга хэмжээг хэрэгжүүлэхээр болжээ.
Гол арга хэмжээнүүдийг шууд дамжуулна
Энэ жилийн баяр наадмын нээлт, хаалтын ажиллагаа болон “Дээлтэй монгол”, “Улаанбаатарын үдэш” зэрэг томоохон соёл, урлагийн арга хэмжээг олон нийтэд шууд хүргэхээр төлөвлөсөн байна.
Тодруулбал, эдгээр арга хэмжээг Д.Сүхбаатарын талбайн LED дэлгэцээр болон YouTube сувгаар шууд дамжуулах аж.
Гадаад үзэгчдэд таван хэлний орчуулгатай хүргэнэ
YouTube сувгаар хийх шууд дамжуулалтыг гадаадын үзэгчдэд зориулан олон хэлний орчуулгатай хүргэхээр зохицуулжээ.
Тодруулбал, шууд дамжуулга нь англи, орос, хятад, солонгос, япон хэлний орчуулгатай байх юм байна. Ингэснээр Монголын Үндэсний их баяр наадмын гол арга хэмжээг гадаадын иргэд, жуулчид илүү ойлгомжтой хүлээн авах боломж бүрдэх аж.
21 аймаг, 9 дүүргийн төв талбайд үзүүлнэ
Наадмын уур амьсгалыг зөвхөн нийслэлд бус, орон нутагт ч тэгш хүргэх зорилгоор нээлт, хаалтын ажиллагааг 21 аймаг болон нийслэлийн 9 дүүргийн төв талбайн LED дэлгэцээр шууд гаргахаар болсон байна.
Ингэснээр иргэд төв цэнгэлдэх хүрээлэнд очих боломжгүй байсан ч өөрийн аймаг, дүүргийн төв талбайгаас баяр наадмын гол үйл ажиллагааг хамтдаа үзэх боломжтой болох юм.
Хөгжлийн бэрхшээлтэй иргэдэд хүртээмжтэй зохион байгуулалт хийнэ
Мөн хөгжлийн бэрхшээлтэй иргэдийн ая тух, хүртээмжийг хангах зорилгоор Төв цэнгэлдэх хүрээлэн болон Д.Сүхбаатарын талбайд тусгайлан тохижуулсан хэсэг, талбай гаргахаар зохицуулжээ.
Үүнээс гадна шууд дамжуулалтыг дохионы хэлний хэлмэрчтэйгээр хүргэхээр төлөвлөсөн байна. Энэ нь баяр наадмын арга хэмжээг илүү хүртээмжтэй, олон нийтэд нээлттэй болгоход чиглэж байна.
Ийнхүү Үндэсний их баяр наадмын гол үйл ажиллагаануудыг төв талбай, аймаг дүүргийн LED дэлгэц болон YouTube сувгаар дамжуулан дотоод, гадаадын үзэгчдэд нэгэн зэрэг хүргэхээр болжээ.
