БНХАУ-ын Сужөү хотод болж буй FISSURE Playground 3 тэмцээний хэсгийн шатанд Монголын 5star баг The MongolZ-ийг 2:0-ээр хожлоо. Ингэснээр The MongolZ тэмцээнээс хасагдаж, 5star доод хүснэгтийн дараагийн шатанд өрсөлдөх эрхтэй болов.
Өнөөдрийн цувралын эхний map-д 5star 13:9, хоёр дахь map-д 13:11-ээр ялж, тоглолтыг хоёр map-д дуусгасан байна.
The MongolZ тэмцээний эхний тоглолтоо Бразилийн MIBR багийн эсрэг хийсэн. Нэмэлт цаг хүртэл үргэлжилсэн уг цувралд MIBR 2:1-ээр ялснаар The MongolZ доод хүснэгтэд шилжиж, тэмцээнээ үргэлжлүүлэхийн тулд дараагийн тоглолтод заавал хожих нөхцөлтэй болсон юм. Гэвч Ази тивийн хаалттай сонгон шалгаруулалтаас эрхээ авсан нутаг нэгт 5star багт ялагдсанаар тэмцээнээ өндөрлүүллээ.
Нийт нэг сая ам.долларын шагналын сантай FISSURE Playground 3 есдүгээр сарын 8-13-нд үргэлжилнэ. Тэмцээнд 16 баг хоёр хэсэгт хуваагдан, давхар хасагдах форматаар өрсөлдөж байна.
5star нь Ази тивийн хаалттай сонгон шалгаруулалтын финалд Chinggis Warriors багийг 2:0-ээр хожиж, Сужөү хотод болох тэмцээний эрхээ авсан. Ингэснээр The MongolZ-ийн хамт Монголыг төлөөлөн оролцож буй хоёр дахь баг болсон юм.
The MongolZ энэ тэмцээнд шинэчилсэн бүрэлдэхүүнтэй оролцов. Содбаяр “Techno” сэлгээнд шилжсэнээр өмнө нь багт тоглож байсан Анарбилэг “cobrazera” үндсэн бүрэлдэхүүнд эргэн ирсэн. Улмаар багийн ахлагч Гарьдмагнай “bLitz”, Өсөхбаяр “910”, Дугарсүрэн “DarkMeister”, Золбаяр “tikuak”, Анарбилэг “cobrazera” нар FISSURE Playground 3-т тоглолоо.
Анарбилэг “cobrazera” тэмцээний турш боломжийн сайн үзүүлэлттэй байв. Тэрбээр MIBR-ийн эсрэг цувралд багийнхаа хамгийн өндөр rating-тай тоглогчдын нэг байсан бөгөөд тэмцээний дундаж rating нь 1.34 байжээ. Гэсэн ч The MongolZ шинэ бүрэлдэхүүнээрээ шийдвэрлэх мөчүүдэд тогтвортой байдлаа хадгалж чадалгүй MIBR болон 5star багт дараалан хожигдов.
Харин 5star-ын хувьд The MongolZ-ийг буулган авсан нь олон улсын томоохон тэмцээнд байгуулсан онцлох ялалтуудын нэг болж байна. Тус багийн бүрэлдэхүүнд Ариунжаргал “ariucle”, Гэрэлт-Од “clouden”, Ууганбаяр “NEUZ”, Дөлгөөн “hoolig4n”, Тэнгис “rate” нар тоглож байгаа бөгөөд өнөөдрийн тоглолтод 1.68 rating гэсэн өндөр үзүүлэлт авч, тэмцээнийг тэргүүлсэн байна.
Өчигдөр аваргын төлөө өрсөлдөх боломжтой багуудын нэгээр нэрлэгдэж байсан The MongolZ ийнхүү 5star-т 0:2-оор ялагдан FISSURE Playground 3-ыг өндөрлүүлэв. Харин 5star тэмцээнээ үргэлжлүүлж, Монголын Counter-Strike-ийг олон улсын тавцанд төлөөлөн өрсөлдөнө.
The MongolZ-ийн ивээн тэтгэгчээр 1xBet ажилладаг бөгөөд баг олон улсын томоохон тэмцээнүүдэд шинэчилсэн бүрэлдэхүүнээрээ өрсөлдөх гэж байна.
Эх сурвалж: HLTV
