Дуучин Кэти Перригийн зүгээс жүжигчин Руби Роузын гаргасан бэлгийн дарамтын тухай мэдэгдэлд хариу өгч, уг мэдээллийг бүрэн худал хэмээн няцаалаа. Дуучны албан ёсны төлөөлөгчид энэ талаар мэдэгдэл хийхдээ Руби Роузын сошиал сүлжээнд нийтэлсэн зүйлсийг “аюултай, хариуцлагагүй худал мэдээлэл” гэж тодорхойлсон байна. Page Six хэвлэл тэдний байр суурийг иш татан нийтэлжээ.
Дөрөвдүгээр сарын 12-нд жүжигчин Руби Роуз Кэти Перриг 20 жилийн өмнө бэлгийн дарамт үзүүлсэн гэж олон нийтийн өмнө буруутгасан юм. Тэрээр сошиал хуудсандаа Кэти Перри түүнийг Мельбурн дахь Spice Market шөнийн клубт дарамталсан гэж бичсэн байна.
Үүний дараа Руби Роуз тухайн үеийн нөхцөл байдлыг илүү дэлгэрэнгүй тайлбарлаж, Кэти Перритэй огт таарахыг хүсээгүй ч нэгэн орой хамгийн дотнын найзынхаа өвөр дээр унтаж байхад нь түүнд зүй бус үйлдэл хийсэн гэж мэдэгджээ. Мөн тэр явдлын дараа асуудлыг намжаахын тулд Перри түүнд АНУ-ын виз авахад тусалсан учраас ийм удаан хугацаанд энэ талаар дуугүй явсан гэж тайлбарласан байна.
Руби Роуз одоо болсон явдлын талаар бүрэн ярихад бэлэн байгаа бөгөөд хөөн хэлэлцэх хугацаа аль хэдийн дууссан ч цагдаад өргөдөл өгсөн гэжээ.
Харин Кэти Перригийн баг Руби Роузын энэ алхмыг олон нийтийн анхаарал татах оролдлого байж болзошгүй гэж үзэж байна. Тэдний мэдэгдэлд Руби Роуз өмнө нь ч янз бүрийн хүмүүсийн талаар сошиал сүлжээнд олон нийтэд хандан буруутгал гаргаж байсан бөгөөд тэдгээр нь удаа дараа няцаагдаж ирсэн гэж дурдсан байна.
Кэти Перригийн хувьд тэрээр 2025 онд жүжигчин Орландо Блумаас салсан. Энэ харилцаанаас тэд Дэйзи Дав нэртэй охинтой болсон юм. Салалтын дараа удалгүй дуучныг Канадын Ерөнхий сайд асан Жастин Трюдотой дотно харилцаатай болсон гэх мэдээлэл гарсан бөгөөд тэднийг Лорен Санчес танилцуулсан байж магадгүй гэсэн яриа ч тархжээ.
Руби Роузын тухайд Австралид танигдсан жүжигчин бөгөөд өөрийгөө нээлттэй лесбиян хэмээн тодорхойлдог. Тэрээр Orange Is the New Black, John Wick 2, Batwoman зэрэг бүтээлүүдээрээ үзэгчдэд танигдсан юм. Харин Batwoman цувралаас эхний улирлын дараа зураг авалтын талбай дээр гарсан олон гомдлын улмаас гарсан гэх мэдээлэл өмнө нь цацагдаж байв.
