Stray Kids хамтлаг 2027 оны Грэммийн шагналд өөрсдийн бүтээлийг нэр дэвшүүлэхгүй байхаар шийджээ. Ингэснээр тэд өмнө нь ижил алхам хийсэн BTS-ийн араас Грэммийн шинэ ангилалтай холбоотой маргаанд байр сууриа илэрхийлж байна.
Энэ жилийн эхээр Грэммийн шагналд Азийн поп хөгжимд зориулсан шинэ төрөл нэмэгдсэн нь K-pop болон J-pop уран бүтээлчдийг тусдаа ангилалд хэт төвлөрүүлэх эрсдэлтэй гэх шүүмжлэл дагуулсан юм.
JYP шийдвэрийг албан ёсоор баталжээ
Stray Kids-ийн агентлаг JYP Entertainment хамтлагийн шийдвэрийн талаар товч мэдэгдэл гаргаж:
“Грэммийн шагналд Stray Kids бүтээлээ нэр дэвшүүлэхгүй”
гэжээ.
Хамтлаг өмнө нь Грэммитэй холбоотой асуултад тодорхой хариулт өгөхөөс зайлсхийж байсан ч энэ удаа байр сууриа ил тод болгосон байна.
Наймдугаар сард “This and That” цомгийн хэвлэлийн хурлын үеэр Hyunjin:
“Бид шагнал авах эсвэл амжилт гаргахыг хэзээ ч зорилгоо болгож байгаагүй”
гэж хэлж байв.
Мөн:
“Бидний хувьд хамгийн чухал зүйл бол шүтэн бишрэгчид маань аз жаргалтай, сэтгэл хангалуун байх явдал юм”
хэмээн онцолжээ.
BTS өмнө нь ижил шийдвэр гаргасан
Stray Kids-ийн энэхүү алхмаас өмнө BTS өнгөрсөн долдугаар сард 2027 оны Грэммийн аль ч төрөлд бүтээлээ нэр дэвшүүлэхгүй гэдгээ мэдэгдсэн.
Тэд тухайн үед хөгжмийг бүс нутаг болон хэлээр нь ялгаж ангилах бус, бүтээл өөрийнхөө чанар, мөн чанараар сонсогдож, үнэлэгдээсэй гэж хүсэж буйгаа илэрхийлжээ.
Ингэснээр K-pop-ийн дэлхийд хамгийн нөлөө бүхий хоёр хамтлаг нэг ижил асуудалд төстэй байр суурьтай болсон байна.
Азийн попын шинэ төрөл маргааны төвд оржээ
Recording Academy энэ оны эхээр Азийн поп хөгжимд зориулсан тусгай ангилал нэмэх шийдвэр гаргасан.
Нэг талаас энэ нь Азийн хөгжмийн зах зээл, K-pop болон J-pop-ийн олон улсын өсөлтийг тусгайлан хүлээн зөвшөөрсөн алхам гэж харагдаж байгаа.
Харин нөгөө талаас шүүмжлэгчид ийм ангилал бий болсноор Азийн уран бүтээлчид гол төрлүүдэд өрсөлдөхийн оронд бүс нутгийн хүрээнд хязгаарлагдаж магадгүй гэж болгоомжилж байна.
Stray Kids болон BTS-ийн шийдвэр энэ маргааныг улам хүчтэй болгожээ.
Stray Kids АНУ-д өндөр амжилт үзүүлсээр байна
Stray Kids-ийн шийдвэр Recording Academy-ийн хувьд онцгой анхаарал татаж буй нэг шалтгаан нь тус хамтлагийн АНУ дахь байр суурь юм.
Эх сурвалжийн мэдээлснээр Stray Kids АНУ-ын цомгийн жагсаалтыг ес дэх удаагаа тэргүүлээд байгаа аж.
Тэд саяхан Нью-Йорк хотод болсон Governor’s Ball хөгжмийн наадамд Lorde болон A$AP Rocky нартай хамт гол тайзны уран бүтээлчээр оролцсон байна.
Мөн цомгийн жагсаалтыг тэргүүлсэн тоогоороо тэднээс дээгүүр бичигдэх цорын ганц хамтлаг нь The Beatles гэж мэдээлжээ.
Найман гишүүн нь бүгд санал өгөх эрхтэй
Stray Kids-ийн найман гишүүн бүгд энэ оны эхээр Recording Academy-ийн санал өгөх эрхтэй гишүүн болсон байна.
BTS-ийн гишүүд ч мөн адил академийн санал өгөх эрхтэй.
Тиймээс хоёр хамтлаг өөрсдөө санал өгөх эрхтэй мөртлөө бүтээлээ нэр дэвшүүлэхгүй байхаар шийдсэн нь Грэммийн шинэ бодлогын талаархи хэлэлцүүлгийг улам өргөжүүлж байна.
Гэхдээ энд нэг зүйлийг ялгаж ойлгох хэрэгтэй. Stray Kids ёслолд биечлэн оролцохгүй гэж мэдэгдсэн бус, харин 2027 оны Грэммийн шагналд өөрсдийн бүтээлийг нэр дэвшүүлэхгүй гэдгээ зарласан юм.
2027 оны Грэммийн нэр дэвшигчдийг арванхоёрдугаар сарын 10-нд зарлахаар төлөвлөжээ.
Эх сурвалж: BBC
