Загварын ертөнцийн хамгийн их хүлээлт үүсгэдэг шоунуудын нэг Victoria’s Secret Fashion Show 2026 тун удахгүй үзэгчдэд хүрнэ. Энэ жилийн шоу аравдугаар сарын 18-нд болох бөгөөд YouTube-ээр шууд дамжуулахаар төлөвлөжээ.
Мөн Victoria’s Secret-ийн албан ёсны Instagram, TikTok хуудсаар шоуны үйл явдлыг үзэх боломжтой байна.
Энэ жилийн тайзнаа ямар моделиуд гарах вэ?
Victoria’s Secret шоуны гол анхаарлын төвд уламжлал ёсоор моделиуд байх бөгөөд энэ жилийн оролцогчдын эхний нэрс аль хэдийн тодорчээ.
Одоогоор Ashley Graham, Adriana Lima, Imaan Hammam, Candice Swanepoel, Gigi Hadid, Alex Consani, Paloma Elsesser, Anok Yai болон Abby Champion нар шоуны тайзнаа алхахаар нэрлэгдээд байна.
Victoria’s Secret-ийн олон жилийн түүхтэй нүүр царай болсон моделиудаас гадна сүүлийн жилүүдэд загварын салбарт хүчтэй гарч ирсэн шинэ үеийн моделиуд нэг тайзнаа цуглах нь энэ жилийн шоуны онцлох хэсгүүдийн нэг болох төлөвтэй байна.
KATSEYE, Megan Thee Stallion, Tate McRae нар тайзнаа гарах төлөвтэй
Victoria’s Secret-ийн шоу зөвхөн загварын тайз биш, томоохон хөгжмийн тоглолтоороо ч алдартай.
Өмнөх жилүүдэд Taylor Swift, Rihanna, Lady Gaga зэрэг дэлхийн хэмжээний уран бүтээлчид Victoria’s Secret-ийн тайзан дээр дуулж байсан бол 2026 оны шоунд KATSEYE, Megan Moroney, Megan Thee Stallion болон Tate McRae нар оролцох төлөвтэй байна.
Ингэснээр энэ жилийн шоу загвар болон хөгжмийн томоохон тоглолтыг дахин нэг дор нэгтгэхээр болжээ.
Энэ удаа Нью-Йорк биш Баруун эрэгт болно
Victoria’s Secret-ийн бүтээлч захирал Adam Selman энэ жилийн шоуг өмнөхөөс нь илүү өргөн хүрээтэй хийхийг зорьж байгаа талаар ярьсан байна.
Тэр:
“Бид энэ жилийн шоуг өнгөрсөн жилийнхээс илүү том, зоримог зохион байгуулахыг хүсч байгаа. Гэвч бидний хийхээр төлөвлөсөн бүхнийг багтаах хэмжээний талбайг Нью-Йоркоос олж чадаагүй. Тиймээс энэ жил шоуг Баруун эрэгт зохион байгуулах болсон. Энэ нь Америкийн өөр нэг дүр төрх, Америк мөрөөдлийн тухай ойлголтыг өөр өнцгөөс харуулах боломж гэж харж байгаа”
гэжээ.
Ингэснээр Victoria’s Secret энэ удаа уламжлалт Нью-Йоркийн орчноос гарч, шоуныхаа цар хүрээ болон дүрслэлийг өөр орчинд туршихаар болж байна.
1995 онд эхэлсэн шоу зургаан жилийн дараа эргэн ирсэн
Victoria’s Secret-ийн анхны загварын шоу 1995 онд Нью-Йорк дахь Plaza Hotel-д зохион байгуулагдаж байв.
Үүнээс хойш уг шоу 2018 он хүртэл бараг жил бүр зохион байгуулагдаж, дэлхийн загвар, энтертайнмент салбарын хамгийн том арга хэмжээнүүдийн нэг болсон юм.
Харин 2018 оноос хойш шоу зургаан жилийн завсарлага авсан. 2023 онд Victoria’s Secret уламжлалт тайзны шоу бус тусгай төсөл хэлбэрээр эргэн ирж, 2024 онд сонгодог форматаа дахин сэргээсэн байна.
Одоо 2026 оны шоу илүү том талбай, шинэ орчин, нэр хүндтэй моделиуд болон олон улсын уран бүтээлчдийг нэг дор цуглуулах төлөвтэй байгаа нь Victoria’s Secret-ийн энэ жилийн арга хэмжээг дахин загварын ертөнцийн гол үйл явдлуудын нэг болгохоор байна.
