Монголын бүжгийн спортын холбооноос зохион байгуулсан Хореографик латин бүжгийн Монгол Улсын аварга шалгаруулах тэмцээн аравдугаар сарын 17-нд болж, “Star Dance Mongolia” клубын багууд өндөр амжилт үзүүлжээ.
Дэлхийн бүжгийн спортын холбооны гишүүн Монголын бүжгийн спортын холбооны энэхүү тэмцээнд “Star Dance Mongolia” клубын 35-45 насны “Star Queen”, өсвөрийн “Star Girls” болон Эрдэнэт хотоос оролцсон “Star Erdenes” багууд хүч сорьсон байна.
Тэмцээний 35-45 насны ангилалд “Star Queen” баг тэргүүн байр эзэлж, Монгол Улсын аварга болжээ.
Харин өмнөх жил дэлхийн аварга болж байсан “Star Girls” баг энэ удаа ч өсвөрийн ангилалд түрүүлж, улсын аваргын цолоо дахин хамгаалсан байна.
“2025 оны дэлхийн аварга, Монгол Улсын аварга “Star Girls” баг аварга цолоо дахин бататгаж, хореографик латин бүжгийн өсвөр насны ангилалд Монгол Улсын аварга цолоо хамгааллаа.”
Эрдэнэт хотоос оролцсон “Star Erdenes” баг 14 багаас гуравдугаар байр эзэлж, хүрэл медаль хүртжээ.
Гурван баг Испанид Монгол Улсаа төлөөлнө
Ингэснээр “Star Queen”, “Star Girls”, “Star Erdenes” гэсэн гурван баг 2026 оны арваннэгдүгээр сарын 28-29-нд Испанийн Гвадалажара хотод болох Хореографик бүжгийн дэлхийн аварга шалгаруулах тэмцээнд Монгол Улсаа төлөөлөх эрхтэй болсон байна.
“Star Dance Mongolia” клубын хувьд дэлхийн тавцанд гарах энэ боломж онцгой ач холбогдолтой. Учир нь “Star Girls” баг 2025 онд дэлхийн шилдэг есөн орны 12 багтай өрсөлдөж, Д.Батсайханы дэглэсэн “Хунт нуур” бүжгээрээ дэлхийн аварга болж байсан юм.
Тус амжилт Монголын бүжгийн спорт төдийгүй багийн спортын түүхэнд онцлох үр дүн болсон бөгөөд энэ жил улсын аваргын цолоо дахин хамгаалсан “Star Girls” баг дэлхийн аваргад дахин хүч үзэхээр бэлтгэлээ үргэлжлүүлж байна.
“Энэ жил улсын аварга цолоо дахин хамгаалснаар дэлхийн тавцанд эх орноо төлөөлөх дараагийн сорилтод хүчээ сорихоор бэлтгэлээ үргэлжлүүлж байна.”
Энэ удаагийн дэлхийн аваргад “Star Dance Mongolia” клуб нэг биш, гурван багийн бүрэлдэхүүнтэй оролцох гэж байгаа нь Монголын хореографик бүжгийн түвшин, багийн уялдаа болон олон улсын өрсөлдөх чадвар өсөж буйг харуулж байна.
Одоо “Star Queen”, “Star Girls”, “Star Erdenes” багуудын дараагийн зорилго нь Испанийн Гвадалажара хотод болох дэлхийн аваргын тайзнаа амжилтаа ахиулж, Монголын бүжгийн спортын нэрийг дахин гаргах явдал юм.
