THE BOYZ хамтлагийн гишүүн асан Ju Haknyeon-ийг бэлгийн үйлчилгээний төлбөр төлсөн гэх худал мэдээлэл нийтэлсэн сэтгүүлчид Өмнөд Солонгосын шүүх 200 сая вон буюу ойролцоогоор 149 мянган ам.долларын нөхөн төлбөр төлөх шийдвэр гаргажээ.
Аравдугаар сарын 28-нд хууль зүйн эх сурвалжуудын мэдээлснээр Сөүлийн төв дүүргийн шүүх Ju Haknyeon-ийн сэтгүүлч Choi-гийн эсрэг гаргасан хохирол нэхэмжилсэн иргэний хэргийг хэсэгчлэн хангаж, түүнд 200 сая вон олгохоор шийдвэрлэсэн байна.
2025 оны мэдээллүүдийг шүүх худал гэж дүгнэв
Сэтгүүлч Choi 2025 оны зургаадугаар сард Ju Haknyeon-ийг өмнө нь насанд хүрэгчдийн киноны жүжигчнээр ажиллаж байсан Японы нэгэн энтертайнерт мөнгө төлж бэлгийн үйлчилгээ авсан гэх агуулгатай нийтлэлүүд гаргажээ.
Мөн Ju Haknyeon эхэндээ уг мэдээллийг үгүйсгэсэн ч дараа нь тухайн уулзалтыг хүлээн зөвшөөрсөн гэх мэдээллийг нийтэлсэн байна.
Эдгээр нийтлэлийн дараа Ju Haknyeon-ийн тухайн үеийн агентлаг One Hundred түүнийг THE BOYZ-оос гарч, онцгой гэрээг нь цуцалсан тухай зарлаж байжээ.
Үүний дараа Ju Haknyeon өөрийн нэр хүнд, сэтгэл санаанд учирсан хохирлыг нөхөн төлүүлэхээр Choi-гийн эсрэг нэг тэрбум воны нэхэмжлэл гаргасан байна.
Шүүх Ju Haknyeon бэлгийн үйлчилгээний төлбөр төлсөн гэх мэдээлэл, мөн дараа нь үүнийг хүлээн зөвшөөрсөн гэх хоёр мэдээллийг хоёуланг нь худал гэж үзжээ.
Шүүх:
“Choi сурвалжлах явцад өөрийн баталгаажуулсан гэж мэдүүлсэн зүйлдээ тулгуурлан Ju бэлгийн үйлчилгээ авсан гэж дүгнэсэн нь хэтэрхий үсрэлттэй логик юм”
хэмээн дүгнэж, түүний баталгаажуулсан гэх мэдээлэл нь Ju Haknyeon мөнгө төлж бэлгийн үйлчилгээ авсныг тогтооход хангалтгүй байсан гэжээ.
Мөн Choi-гийн шүүхэд гаргаж өгсөн нотлох баримтууд нь нийтэлсэн мэдээллийг үнэн гэж үзэхэд хүрэлцэхгүй гэж тогтоосон байна.
Баримтыг хангалттай шалгаагүй гэж шүүх үзжээ
Шүүхийн үзэж буйгаар idol дуучны нэр хүндэд ноцтой хохирол учруулж болзошгүй мэдээлэл нийтлэхийн өмнө Choi баримтыг хангалттай нягтлаагүй байна.
Сэтгүүлчийн тал нийтлэл нь үнэн байсан, эсвэл үнэн гэж итгэх хангалттай үндэслэлтэй байсан хэмээн маргаж, One Hundred Label-ийн тэргүүн Cha Ga Won-той хийсэн яриагаа үндэслэл болгон дурджээ.
Гэвч шүүх уг тайлбарыг хүлээж аваагүй байна.
Шүүх:
“Choi нийтлэлийн эхийг үзүүлээд зөвхөн баталгаажуулахыг хүссэн. Ju мөнгө төлж бэлгийн үйлчилгээ авсан байж болох нөхцөл байсан эсэх, үүнтэй холбоотой тодорхой нотлох баримт байсан эсэх, тэр баримт нь яг юу байсан талаар шалгаагүй”
хэмээн онцолжээ.
Ингээд шүүх Choi худал мэдээлэл нийтэлснээр Ju Haknyeon-ийн нэр хүндэд хохирол учруулж, түүнд сэтгэл санааны ноцтой дарамт учруулсан гэж дүгнэж, нөхөн төлбөрийн хэмжээг 200 сая воноор тогтоосон байна.
Сэтгүүлчид эрүүгийн хэрэг ч үргэлжилж байна
Choi-г энэ оны тавдугаар сард Ju Haknyeon-ийн талаар худал мэдээлэл тараан нэр хүндэд нь халдсан гэх үндэслэлээр цагдан хорихгүйгээр яллагдагчаар татсан байна.
Тиймээс 200 сая воны нөхөн төлбөрийн иргэний хэргээс гадна түүнтэй холбоотой эрүүгийн хэрэг тусдаа шүүхээр үргэлжилж байгаа аж.
