Жүжигчин Сидни Суини ирэх есдүгээр сард дэлгэцнээ гарах “Christy” намтарчилсан уран сайхны кинонд домогт эмэгтэй боксчин Кристи Мартины дүрийг бүтээжээ. Тэрбээр “Euphoria”, “White Lotus” зэрэг бүтээлээр танигдаж байсан бол энэ удаад боксчин болохын тулд биет болон сэтгэл зүйн хувьд бүрэн өөрчлөгджээ.
“Эмэгтэй Рокки” хэмээн нэрлэгддэг Кристи Мартины амьдралаас сэдэвлэсэн уг киног алдарт промоутер Дон Кингтэй гэрээ байгуулсан анхны эмэгтэй боксчны түүхээр бүтээсэн байна. 27 настай жүжигчин Суини дүрдээ орж, Кристигийн биеийн хэлбэр галбиртай төстэй болохын тулд 15 кг жин нэмэх шаардлагатай болжээ.
Тэрбээр бэлтгэл сургуулилтаа өдөрт гурав хуваан хийсэн байна. Өглөө хүчний бэлтгэл, дараа нь гурван цагийн боксын бэлтгэл, дараа нь дахин хүчний бэлтгэл хийж байсан тухайгаа ярьжээ. Мөн 1.5 цаг тутамд хоол идэх шаардлагатай болсон бөгөөд энэ нь нэмсэн жингээ хадгалахад чухал байсан аж.
“Би бүр өөр хүн болчихсон мэт мэдрэмж төрсөн. Биеийн маань галбир огт өөр болсон. Энгийн үед 23 размерын жинс өмсдөг байсан бол 27 размер арай ядан таарсан. Хөх, өгзөг ч мэдэгдэхүйц томорсон. Би биеэ хараад ‘Ээ бурхан минь’ гэж бодож байлаа. Гэхдээ үнэхээр хүчирхэг болсон” хэмээн тэрбээр сэтгэгдлээ хуваалцжээ.
“Christy” кино ирэх есдүгээр сард Торонтогийн кино наадмаар албан ёсоор нээлтээ хийхээр болжээ.
Харин бодит амьдрал дээр 57 настай Кристи Мартин нийт 59 тулаанд оролцож, 49 ялалт байгуулсан бөгөөд үүний 32-ийг нь нокаутаар дуусгасан байна. Тэрбээр эмэгтэй хүн ч мэргэжлийн боксын рингэнд амжилтад хүрч болдгийг харуулсан анхдагчдын нэг бөгөөд бокс сонирхогчдын дунд “амьд домог” гэж үнэлэгддэг.
