IVE шинэ мини цомгийнхоо уур амьсгалыг фэнүүддээ урьдчилан мэдрүүлж, Сөүлд болсон “Spotify DIVE Academy” арга хэмжээнд шинэ дуунуудынхаа тайзны үзүүлбэрийг анх удаа толилуулжээ.
Ahn Yujin, Ga-eul, Rei, Jang Wonyoung, Liz, Leeseo нараас бүрдсэн IVE аравдугаар сарын 19-нд Сөүл хотын ARC Gangnam-д Spotify-тай хамтран “Spotify DIVE ACADEMY” арга хэмжээг зохион байгуулсан байна.
Тус арга хэмжээний үеэр тэд аравдугаар сарын 26-нд гарахаар төлөвлөсөн “Lux Can Kill” мини цомгийнхоо талаар ярьж, бүтээлийн арын түүхээс хуваалцан, DIVE нэртэй албан ёсны фэнүүдтэйгээ онцгой мөчүүдийг өнгөрүүлжээ.
IVE эхлээд хүчтэй хэмнэл, нууцлаг уур амьсгалтай “BANG BANG” дуугаараа тайзыг нээсэн бөгөөд эхний мөчөөс л үзэгчдийн чанга дэмжлэгийг авчээ.
Үүний дараа гишүүн бүр шинэ цомгийн ертөнцөд ямар “баатар” дүрээр гарч байгааг танилцуулсан байна. Ahn Yujin нь Captain Purple, Ga-eul нь Wonder Green, Rei нь Jin Yellow, Jang Wonyoung нь Bat Pink, Liz нь Super Blue, Leeseo нь Spider Red гэсэн дүртэй аж.
IVE “Lux Can Kill”-ийн үндсэн санааг:
“Зүгээр л оршин байгаагаараа шийдвэрлэх цохилт өгч чаддаг баатруудын үзэл санаанаас эхэлсэн цомог”
хэмээн тайлбарлажээ.
Гишүүд шинэ бүтээлийнхээ талаар шууд бүхнийг дэлгээгүй ч хөдөлгөөн, нүүрний хувирал, тайзны тоглоомоор дамжуулан тодорхой “дохио” өгч, фэнүүдийн хүлээлтийг нэмэгдүүлсэн байна. Мөн DIVE-уудын IVE-д зориулан сонгосон “чадварууд”-ыг баатрын сэдэвтэй холбон танилцуулж, арга хэмжээнд илүү хөгжилтэй өнгө нэмсэн аж.
“Lux Can Kill”, “Girls Girls Girls”-ийг анх удаа амьдаар үзүүлэв
IVE арга хэмжээний хамгийн оргил мөчид нэрт дуу “Lux Can Kill” болон цомогт багтсан “Girls Girls Girls” дууны тайзны үзүүлбэрийг анх удаа олон нийтэд хүргэжээ.
“Lux Can Kill” дууны үеэр гишүүд өөртөө итгэлтэй, хүчтэй дүр төрхөө тодотгож, хэмнэлтэй нарийн уялдсан нэгдмэл бүжгээрээ анхаарал татсан байна.
Тус бүжгийн онцлох хөдөлгөөн нь гараараа бууны хэлбэр гарган “буудаж” буй мэт дүрслэх хэсэг бөгөөд энэ нь дууны хамгийн амархан тогтох хөдөлгөөнүүдийн нэг болжээ.
Харин “Girls Girls Girls” дуугаараа IVE өмнөх хүчтэй, сүрлэг уур амьсгалаас өөр, илүү эрч хүчтэй, сэргэлэн төрхөө харуулсан байна. Ингэснээр шинэ цомог нэг өнгөөр хязгаарлагдахгүй, хамтлагийн өөр өөр хэв маягийг багтаасныг үзүүлжээ.
Эх сурвалжийн мэдээлснээр “Lux Can Kill” дууны клип гарсан даруйдаа YouTube-ийн дэлхийн хөгжмийн клипийн трендийн жагсаалтыг тэргүүлсэн байна.
Мөн Өмнөд Солонгос, Япон, Их Британи, Франц, Канад, Бразил зэрэг зургаан улс, бүс нутгийн жагсаалтад нэгдүгээр байрт хүрсэн бөгөөд АНУ, Герман, Австрали зэрэг нийт 18 улс, бүс нутгийн эхний аравт оржээ.
Ийнхүү IVE шинэ мини цомгоо бүрэн гаргахаас өмнө “Lux Can Kill”-ийн гол үзэл санаа, дүрүүд болон тайзны өнгө төрхөө фэнүүддээ танилцуулж, шинэ эргэн ирэлтийнхээ хүлээлтийг улам өсгөөд байна.
