Алдартай Өмнөд Солонгосын жүжигчид болох Lee Byung Hun болон Lee Min Jung нар дахин олны анхаарлын төвд оржээ. Энэ удаа тэдний Лос Анжелест байрлах хувийн байшин өнгөрсөн жил хулгайд өртсөн талаарх мэдээлэл анхаарлын төвд байна.
Lee Min Jung: “Энэ бол нуугаад өнгөрөх зүйл биш”
Lee Min Jung саяхан өөрийн YouTube суваг дээр хулгайн талаар илэн далангүй ярьжээ.
“Өнгөрсөн жил манай байшинд хулгай орсон. Энэ бол нуугаад өнгөрөх зүйл биш. Сонин хэвлэлд ч гарсан. Аз болоход их хохирол гараагүй, гэхдээ нэг шургуулга эвдэрсэн байсан,” хэмээн тэр дурджээ.
Тухайн үед АНУ-ын алдартай TMZ мэдээллийн агентлаг энэ хэргийг сурвалжилсан бөгөөд хулгайчид шилэн хаалгыг эвдэж орсон гэж мэдээлсэн байна. Lee Byung Hun-ы харьяалагддаг BH Entertainment агентлаг ч мөн энэхүү явдлыг баталж, их хэмжээний хохирол гараагүй хэмээн тайлбарласан байна.
Хэргийг цуврал хулгайн нэг хэсэг байж болзошгүй гэж үзжээ
АНУ-ын хууль сахиулах байгууллагуудын үзэж байгаагаар, уг хэрэг нь Лос Анжелесийн тансаг дүүргүүдийг онилсон хулгайн цувралын нэг хэсэг байж болзошгүй гэжээ. Ойролцоох жүжигчин Лина Уэйтийн гэрт ч мөн хулгай орж, 200,000 ам.долларын үнэт эдлэл алдагдсан байна.
Аюулгүй байдлыг чангатгасан алхмууд
Хулгайн дараа алдарт хос аюулгүй байдлаа сайжруулах зорилгоор байшинд төмөр хаалт суурилуулсан байна. Мөн Lee Min Jung Сан Франциско болон Лос Анжелес хотуудад гэмт хэрэг, ялангуяа хулгайн гэмт хэрэг нэмэгдэж байгаад санаа зовниж буйгаа илэрхийлжээ.
