Хятадын түүхэн, тулаант киноны нүүр царай Монголд бууна
Хятадын кино, телевизийн урлагийн нэрт төлөөлөгч, түүхэн болон тулаант төрлийн бүтээлээрээ өргөн танигдсан жүжигчин, продюсер Лю СяоФэн ойрын хугацаанд Монголд зочлохоор бэлтгэж байна.
Түүнийг Хайнань дахь “Күньпэн” кино, телевизийн соёлын компанийн ТУЗ-ын даргаар ажилладаг, БНХАУ-ын соёлын салбарын бодлогын түвшинд нөлөөтэй уран бүтээлчдийн нэг гэж үздэг. Албан ёсны үнэлгээний дагуу түүнд “Үндэсний нэгдүгээр зэрэглэлийн жүжигчин” цол хүртээсэн нь Хятадын Засгийн газраас өгдөг жүжигчдийн хамгийн дээд зэрэглэлийн шагналд тооцогддог.
Шэньяны Ляонин мужид 1971 оны нэгдүгээр сарын 16-нд төрсөн тэрээр Шанхайн Театрын академийг жүжигчний мэргэжлээр төгсөж, мэргэжлийн театр, кино урлагт бүрэн эрхтэйгээр хөл тавьжээ.
“Мянган төрхтэй” хочны цаадах хөдөлмөр
Лю СяоФэнг уран бүтээлийн хүрээнд “мянган төрхтэй жүжигчин” гэж хочилдог. Энэ нь нэг л төрлийн дүрд “гацахгүй”, тэс өөр характер, нас, мэргэжил, зан чанартай олон дүрийг итгэл төрүүлэм бүтээж ирснийг нь илтгэнэ.
Царайлаг төрх нь түүнийг бага байхаас нь олны анхааралд оруулж байсан ч тэр шууд урлагийн сургуульд ороогүй. Ахлах сургуулиа төгсөөд их сургууль сонгохын оронд зочид буудлын ресторандад зөөгчөөр ажиллаж, дөрвөн жилийг энгийн ажилчнаар өнгөрөөжээ.
Амьдралаа өөрчлөх эрэл хайгуулын үеэрээ тэр сониноос Шанхайн Театрын академи элсэлт авч байгаа тухай зар харж, бүх хүчээ дайчлан бэлтгэсний эцэст элсэн орсон нь хувь заяаны том эргэлт болсон гэж өөрөө дурсдаг.
Тайзнаас дэлгэц рүү гарсан анхны алхам
Сургуулийн жилүүдэд Лю СяоФэн тайзны жүжиг, богино хэмжээний кино, оюутны бүтээлүүдэд тоглож, ангийнхаа дунд төдийгүй театр сонирхогчдын хүрээнд танигдсан залуу авьяастан болж чадсан. Энэ туршлага нь сургуулиа төгсөөд мэргэжлийн студи, найруулагчдын анхааралд өртөхөд томоохон түлхүүр болж, төгсөөд удаагүй байхад нь анхны бүрэн хэмжээний кинонд гол дүр бүтээх урилга авч байв.
1995 онд тэрээр “Long Day’s Journey into Night” жүжгийн гол дүрд тоглож, Олон улсын О’Ниллийн театрын наадамд оролцсоноор мэргэжлийн ертөнцөд хүчтэй нэвтэрч ирсэн. Мөн тэр ондоо анхны телевизийн олон ангит кино болох “Зы Еэ” (Midnight) үзэгчдэд хүрч, нэр хүндээ өргөжүүлжээ.
Хятадын драмын ертөнц дэх тогтвортой байр суурь
Тэр цагаас хойш Лю СяоФэн кино, телевизийн олон төсөлд дараалан ажиллаж, жүжигчний замналаа эрчимтэй өргөжүүлсэн. 1999 онд “Хаврын гэгээ ба Жу Бажегийн домог” цувралын дүрээр өргөн үзэгчдийн танил болж, 2000 онд “Ван Бөгийн үхэл” киноны гол дүр түүний карьерын дараагийн шатны гол түлхүүр болж өгсөн.
Домгийн сэдэвтэй “Цагаан могойн домог” цувралд Фахай ламын дүрийг бүтээсэн нь түүнийг олон нийтэд бүр илүү гүн сэтгэгдэл төрүүлсэн жүжигчин болгосон. Тэр үеэс хэвлэл мэдээлэл, кино шүүмжлэгчид түүнийг “тагнуулын сэдэвт бүтээлийн гол дүрийн мэргэжилтэн”, “олон төрлийн дүрд хувирч чаддаг жүжигчин” гэж тодорхойлох болсон.
2008 онд тэр кино наадмаас шилдэг туслах дүрийн шагнал хүртэж, 2010 онд Чанчунь хотын кино наадмын шүүгчээр оролцсон нь салбар доторх нэр хүндийнх нь нэг баталгаа болсон.
Гэр бүл, хувийн амьдралын төлөө хийгдсэн золиос
Хувийн амьдралын тухайд Лю СяоФэн жүжигчин Жу Мөтэй гэр бүл болж, хоёр хүүтэй болсон. Хэвлэлд өгсөн ярилцлагадаа тэрээр хүүхдүүдээ бага насанд нь өөрийн гараар өсгөхийг илүүд үзсэн тул уран бүтээлээ тодорхой хугацаанд “удаашруулж”, гэр бүлдээ илүү цаг зориулсан тухайгаа дурдаж байв.
Гэсэн ч тэр урлагаас бүр мөсөн холдсонгүй. Сүүлийн жилүүдэд жүжиглэхийн зэрэгцээ продюсерын ажилд идэвхтэй оролцож, “Улсын хүүхдүүд” зэрэг телевизийн төслийг продюсерлан, салбарын мэргэжилтнүүдээс сайн үнэлгээ авсан.
40-өөс дээш олон ангит, 10 гаруй кино: онцлох дүрүүд
2000 оноос хойш Лю СяоФэн 40 гаруй олон ангит кино, арав гаруй бүрэн хэмжээний кинонд гол болон туслах чухал дүрүүдэд тогложээ. “The Death of Wangbo”, “Penicillin 1944”, “Who Is Undercover”, “Qomolangma”, “The Haunting 3” зэрэг драмууд нь үзэгчдийн дунд түгээмэл дурдагддаг бүтээлүүдийн нэг хэсэг юм.
Түүхэн сэдэвт бүтээлүүдэд түүний бүтээсэн дүрүүд онцгой байр суурь эзэлдэг. “China 1921” кинонд Сунь Ят Сен, “Wo Jiao Zhang Si De” бүтээлд Мао Зэдун, “The First President” кинонд Ван Жин Вэй нарын түүхэн удирдагчдын дүрийг бүтээж, бодит хүний дүрийг үнэмшилтэйгээр зураглаж чадсанаараа олон нийтийн талархлыг хүлээсэн.
Эх оронч, тагнуул, тулаанч, хүнд нөхцөл дунд шийдвэр гаргагч хүний дүрүүдийг тэр онцгой гүн, дотоод зөрчилтэй нь хамт гаргаж чаддаг гэж Хятадын кино шүүмжлэгчид онцолдог.
2025 оны сүүлийн дүрүүд ба өнөөгийн статус
Сүүлийн үеийн уран бүтээлүүдээс дурдвал, 2025 онд Лю СяоФэн “Wo Jiao Zhang Si De” кинонд дахин Мао Зэдуны дүрийг бүтээж, “Youth in the Flames of War” олон ангит дайны сэдэвтэй бүтээлд туслах дүрээр оролцсон. Мөн “The Haunting 3” кинонд Ли Жуан, “Qomolangma” бүтээлд уулын авиралтын тухай түүхийн дүрээр тоглож, эрчтэй, сэтгэлзүйн ачаалалтай дүрүүдийг тасралтгүй бүтээсээр байна.
Өнөөдөр тэр Хятадын жүжигчдийн хамгийн өндөр зэрэглэл болох “Үндэсний нэгдүгээр зэрэглэлийн жүжигчин” цолтой, олон талын чадвар, туршлагаараа салбартаа үлгэр жишээ уран бүтээлчдийн нэг хэвээр байна. Жүжигчний карьерээ үргэлжлүүлэхийн зэрэгцээ продюсерын ажилд хүч үзэж, Хятадын соёл, кино урлагийн орон зайд өөрийн бие даасан мөрөө тод үлдээж чадсан нь түүний мэргэжлийн амьдралын бас нэг том ялалт болжээ.
Ийнхүү олон төрлийн дүр, олон арван бүтээлээрээ үзэгчдэд танигдсан Лю СяоФэн удахгүй Монголын үзэгчидтэй “амьд” уулзалт хийхээр зочлох гэж байгаа нь түүнийг “Алдартнууд” буланд онцлох бас нэг шалтгаан болсон юм.
