Солонгост ирээд сонгон шалгаруулалт, дүрээ авсан мөчөө дэлгэв
“Бриджертон” цувралын 4-р улиралд “Софи” дүрийг бүтээсэн солонгос-австрали жүжигчин Ерин Ха саяхан БНСУ-д ирэх үеэрээ тус бүтээлд нэгдсэн тухайгаа илэн далангүй ярьжээ. Тэрээр анх өөрийн бичлэгээр шалгаруулалтад орсон бөгөөд хүнс дэлгүүрээр явж байхдаа агентлагаасаа утас авч, 24 цагийн дотор нэмэлт бичлэг явуулах шаардлагатай болсон гэж дурдсан байна. Үүний дараа хамт тоглогч Люк Томпсонтой онлайнаар жүжиглэлт хийж, хэд хоногийн дараа сонгогдсоноо мэдсэнээр “Софи” дүр түүнд иржээ.
Эмээ Сон Сүгээс ирсэн үг, нүцгэн хэсгийн эвгүй мэдрэмж
Ерин Ха Солонгосын энтертайнмент салбартай хувийн холбоотой гэдгээ мөн хэлсэн байна. Тэрээр ахмад жүжигчин Сон Сүгийн ач охин бөгөөд эмээ нь түүнд онцгой зөвлөгөө өгөөгүй ч улирлыг бүтнээр нь үзээд дараа нь зураг илгээсэн гэжээ.
Тэр мөчийг дурсахдаа эмээ нь “Би чамаар бахархаж байна. Би чамд хайртай” гэж хэлсэн нь ихэд сэтгэл хөдөлгөм байсан гэж ярьсан байна. Гэхдээ эмээ нь мөн “Нүцгэн хэсгүүдийн заримыг харчихлаа… жаахан эвгүй байсан шүү” гэж тоглоом шоглоомоор хэлсэн гэжээ.
Нүцгэн хэсгийн өмнөх дарамт, зураг авалтын талбайн “аюулгүй мэдрэмж”
Жүжигчин өөрөө ч тэдгээр хэсгийг авахын өмнө санаа зовнил их байсан гэдгээ хүлээн зөвшөөрсөн байна. Тэрээр нүцгэн хэсгүүдийг авахын өмнө дарамт мэдэрч, олон зүйлд болгоомжилж байсан бөгөөд Солонгос болон өрнийн гоо сайхны стандартад байдаг ялгааг ч бодож үзсэн гэжээ.
Гэхдээ зураг авалтын талбай түүнийг аюулгүй, тайван мэдрэмжтэй байлгаж чадсан гэж онцолсон байна. Тэрээр “Тэр хэсгүүд дээр биднийг тусгайлан чиглүүлж, удирдах хүн байсан” гэж тайлбарлаад “Жүжигчид, багийнхан бүгд хүн бүрийг тав тухтай, аюулгүй байлгахыг хичээсэн” гэж хэлжээ.
“Дэлгэцийн химия”, фэнүүдийн хүсэл ба арьс өнгийн маргаанд өгсөн байр суурь
Ерин Ха болон улирлын эрэгтэй гол дүрийг бүтээж буй Люк Томпсон хоёрын дэлгэцэн дээрх зохицол олны анхааралд өртөж, зарим фэнүүд тэдний харилцаа бодит амьдрал дээр ч үргэлжлээсэй гэж хүссэн тухай яриа гарчээ. Тэр үүнд “Тийм хариу үйлдлүүдийг би ч бас харсан. Магадгүй хүмүүс түүх бодит амьдрал дээр амилчихыг хүсдэг байх” гэж хэлсэн байна. Мөн “Люк бол миний маш их хүндэлдэг жүжигчин. Би түүнийг найз хүнийх нь хувьд талархдаг. Хэрвээ хүмүүс тэгж мэдэрч байгаа бол цуврал амжилттай болсны шинж” гэжээ.
Үүний зэрэгцээ, 4-р улирлын сурталчилгааны үеэр зарим зураг, бичлэгт Ерин Ха бусад жүжигчдээс “бага тод” гарсан мэт харагдсан гэж үзсэн хүмүүс сошиал орчинд маргаж, арьс өнгөөр ялгаварласан байж магадгүй гэх таамаг ч гарсан байна. Ерин Ха энэ талаар “Би тэр сэтгэгдлүүдийг харсан. Гэхдээ зураг авалтын талбай дээр байх хугацаандаа би арьс өнгөөр ялгаварлан гадуурхсан зүйл огт мэдрээгүй” гэж хэлжээ. Тэрээр “Сурталчилгаан дээр жижиг сажиг зүйлс анзаарагдаагүй өнгөрсөн байж магадгүй. Гэхдээ санаатай, ухамсартай хийсэн зүйл гэж би бодохгүй байна” гэж нэмжээ.
Мөн “Хүмүүс яагаад тэгж харсан байж болохыг ойлгож байна. Ийм мөчөөс бид хамтдаа суралцаасай гэж хүсэж байна. Зөвхөн яриа нь хэт дайралт, үзэн ядалт руу шилжихгүй байгаасай” гэж хэлсэн байна.
