Лиза Кудроу ботоксоос татгалзсан шалтгаанаа илчиллээ

Ботоксын дараах сөрөг нөлөө

“Friends” цувралаар алдаршсан жүжигчин Лиза Кудроу гоо сайхны тарилга хийлгэсний дараа гарсан сөрөг нөлөөний улмаас ботоксоос бүрэн татгалзсан тухайгаа ярьжээ. Тэрбээр “The Hollywood Reporter”-д өгсөн ярилцлагадаа энэ тухай дэлгэрэнгүй хуваалцсан байна.

Шинээр гарах “The Comeback” цувралын гуравдугаар улирлын өмнөхөн өгсөн ярилцлагад Кудроу 60 наснаас хойш анх удаа ботокс туршиж үзсэнээ дурдсан. “Нэг өдөр эмээ шигээ харагдах вий гэж айдаг ч би насанд хүрсэн дүрд тоглохдоо баяртай байдаг” гэж тэр хэлсэн байна. Гэвч процедурын дараа түүний нүд үрэвсэж, арьсан дээр овгор товгор өөрчлөлт гарсан аж. “Миний нүд үрэвсэж, духан дээр сонин хэлбэр гарсан. Тиймээс дахиж хийхгүй гэж шийдсэн” гэж Кудроу онцолжээ.

Өмнөх шийдвэрүүд ба карьер

Тэрбээр өмнө нь ч гоо сайхны мэс заслаас татгалзах байр сууриа илэрхийлж байсан. Хоёр жилийн өмнө Armchair Expert подкастад оролцохдоо “Би хэнийг ч шүүмжилдэггүй. Зарим хүн хагалгааны дараа үнэхээр сайхан харагддаг. Гэхдээ ямар нэг зүйл буруу болбол би өөртэйгээ адилхан харагдахаа больж, бүр хөгшин харагдаж магадгүй гэж айдаг” гэж хэлж байжээ.

Сонирхуулахад, Кудроу өсвөр насандаа хамрын хэлбэрээсээ болж өөртөө итгэлгүй байсан тул 16 настайдаа ринопластик хийлгэж байсан бөгөөд үүнийг амьдралынхаа зөв шийдвэрүүдийн нэг гэж үздэг байна.

Тэрээр 1994 онд “Friends” цувралаар олны танил болж, 2005 онд “The Comeback” цувралд тоглон “Эмми”-д нэр дэвшиж байв. Хувийн амьдралын хувьд 1995 онд Мишель Стернтэй гэрлэж, 1998 онд хүү Жулиантай болсон бөгөөд одоогоор Беверли-Хиллст амьдарч байна.