Анхны мөрдөн шалгалтын алдаа, баривчлах хүсэлтийг хэрэгсээгүй шийдвэр шинэ асуулт дагуулж байна
Саяхан бусдад зодуулсны улмаас нас барсан найруулагч Ким Чан Минтай холбоотой хэрэг Өмнөд Солонгос даяар хүчтэй шүүмжлэл дагуулж байна. Мөрдөн шалгалтын явц хангалтгүй, шүүхийн шийдвэр ойлгомжгүй, сэжигтнүүд одоог хүртэл сул чөлөөтэй байгаа зэрэг нь олон нийтийн бухимдлыг дээд цэгт нь хүргэв.
JTBC телевизийн “Scandal Supervisor” нэвтрүүлгийн 4 дүгээр сарын 6-ны дугаарт энэхүү хэргийн явцыг дахин сөхөж, хэрэгт холбогдсон хүмүүсийн талаарх мэдээлэл болон мөрдөн шалгалтын өнөөгийн байдлыг дэлгэрэнгүй хөнджээ.
Сэтгүүлч Ян Вон Бо нэвтрүүлгийн үеэр: “Мөрдөн шалгалтыг дутуу дулимаг явуулсантай холбоотой маргаан улам газар авч байна. Прокурорын байгууллагаас энэ хэргийг дахин шалгах тусгай баг байгуулсан гэх мэдээлэл бий” хэмээн онцолсон байна.
Сэтгэл судлалын профессор Пак Сан Хи тухайн явдлыг тайлбарлахдаа: “Өнгөрсөн оны 10 дугаар сарын 20-ны үүрээр найруулагч Ким Чан Мин хөгжлийн бэрхшээлтэй хүүгийнхээ хамт хоолны газарт очсон байдаг. Тэнд байсан хоёр эрэгтэй түүнийг бүлэглэн зодож, улмаар тэрээр унаж хүнд гэмтсэн. Эмнэлэгт хүргэгдсэн ч тархины үхжилтэй гэж оношлогдон, нас барсны дараа эрхтнээ хандивлаж дөрвөн хүний амийг аварсан” гэв.
Эхний шатанд цагдаа нар зөвхөн нэг сэжигтнийг тогтоосон гэх мэдээлэл гарсан ч талийгаачийн ар гэрийнхэн өөрсдөө хяналтын камерын бичлэг, гэрчийн мэдүүлэг цуглуулж прокурорт өгсөн байна. Үүний дараа нэмэлт шалгалтын хүсэлт гарч, эцэст нь хоёр сэжигтнийг хүний амь нас хохироосон гэмтэл учруулсан гэх үндэслэлээр саатуулалгүй шилжүүлжээ.
Одоо энэ хэрэг дээр гурван прокурор, таван мөрдөгчөөс бүрдсэн тусгай баг ажиллаж байгаа бөгөөд шинжлэх ухаан, эмнэлгийн нотолгоонд тулгуурлан хурдан, нарийн дахин шалгана гэж мэдэгдсэн байна.
Сэжигтнүүд чөлөөтэй байгаа тухай мэдээлэл, хип-хоп дууны маргаан бухимдлыг улам өдөөв
Ар гэрийнхэн нь анхны мөрдөн шалгалтыг хангалтгүй явуулсан цагдаад, мөн баривчлах зөвшөөрөл олгоогүй шүүхэд туйлын гомдолтой байгаа аж. Ян Вон Бо энэ талаар, “Сэжигтнүүдийг одоо хүртэл саатуулалгүй, ойр хавьд чөлөөтэй явж байна гэж ар гэрийнхэн үзэж байна. Ийм нөхцөлд хүмүүс үнэн мөнийг өөрсдөө хайх гэж оролддог онлайн мөрдөгчид гарч ирдэг” хэмээн ярьжээ.
Өмгөөлөгч Сон Су Хо цахим орчинд тархсан хоёр сэжигтэнтэй холбоотой гэх зураг үнэхээр байгаа ч бүх мэдээлэл үнэн биш гэдгийг тайлбарласан байна. Түүний хэлснээр, зурган дээрх нэг хүн хэрэгтэй холбоогүй бол нөгөө хүн тухайн газар байсан ч зодооныг зогсоох гэж оролдсон байж магадгүй аж. Харин тэднийг бүлэглэлтэй холбоотой гэх яриаг холбогдох тал үгүйсгэж, “тэд бол ердөө танилууд” гэж мэдэгдсэн байна.
Олон нийтийн уур бухимдлыг улам нэмэгдүүлсэн өөр нэг асуудал нь хэрэгт холбогдсон гэж яригдаж буй хүмүүсийн нэг энэ явдлын дараа хип-хоп цомог гаргасан гэх мэдээлэл байлаа. Ян Вон Бо, “Хэрэгт холбоотой хүмүүсийн нэг нь хип-хоп цомог гаргасан гэх мэдээлэл байна” гэж дурдсан байна. Тухайн хүний танил хэвлэлд ярилцлага өгөхдөө уг цомог үнэхээр гарсан гэж хэлээд, эвлэрлийн оролдлого бүтэлгүйтсэн талаар ярьжээ.
Өмгөөлөгч Пак Жи Хүн, “Хэрэв энэ үнэн бол хохирогч нас барснаас ердөө дөрвөн сарын дараа хөгжмөө гаргасан гэсэн үг. Дууны үгс ч цочирдом гэж яригдаж байна” хэмээн хэлсэн байна. Маргаан өрнөсний дараа тухайн дууг YouTube-ээс устгасан гэх мэдээлэл ч гарчээ.
Нэвтрүүлэгч Ким Ха Ын ар гэрийнхний мэдээллийг иш татан сэжигтнүүдээс одоог хүртэл ямар ч уучлалт, холбоо барих оролдлого ирээгүйг онцолсон байна. Мөн нэгэн YouTube сувгаар хэрэгт холбогдсон байж болзошгүй хүнийг “Миний цохилт хуучраагүй байна, ганцхан цохилтоор унагаасан” гэж сайрхсан гэх мэдээлэл гарсан нь ч олон нийтийн бухимдлыг улам дэвэргэжээ.
Өмгөөлөгч Сон Су Хо цагдаа хоёр удаа баривчлах зөвшөөрөл хүссэн ч шүүх хоёуланг нь хэрэгсээгүйг тайлбарлаад, “Баривчлах үндэслэл хангахуйц хэмжээний бүрэн мөрдөн шалгалт хийгдсэн үү, эсвэл шалгалт хангалтгүй байсан учраас зөвшөөрөөгүй юу гэдэг нь хамгийн чухал асуулт. Ил тод байдалгүй бол олон нийт үүнийг ойлгох боломжгүй” гэж хэлсэн байна.
Мөн Кёнгги мужийн хойд хэсгийн Цагдаагийн газар Гүригийн цагдаагийн хэлтсийн анхны мөрдөн шалгалт зохистой байсан эсэхийг дотооддоо шалгаж байгаа аж. Энэ хооронд сэжигтнүүдэд хатуу ял оноохыг шаардсан өргөдөл, шаардлагууд цахим орчинд улам өргөн тархсаар байна.
