Жүжигчин хүүгээ зургаадугаар сард төрүүлэхээр хүлээж байна
Алдарт жүжигчин Nam Bo Ra жирэмсний хугацаандаа BTS-ийн V-ийн зургуудыг их хардаг байсан тухайгаа ярьж, Солонгосын хэвлэлүүдийн анхаарлыг татжээ.
Одоо найман сартай жирэмсэн байгаа Nam Bo Ra дөрөвдүгээр сарын 19-нд KBS2 сувгийн “The Return of Superman” нэвтрүүлэгт оролцох үеэрээ энэ тухай хуваалцсан байна.
Зургаадугаар сард төрөхөөр төлөвлөж буй жүжигчин хүүтэй болж байгаагаа илчилж, мөн хүүхдийнхээ эхо зургийг үзүүлжээ. Kim Jong Min хүүхдийн нүүрний хэлбэр аль хэдийн тод харагдаж байна гэж хэлэхэд Nam Bo Ra үүнийг BTS-ийн V-тэй холбон тайлбарласан байна.
“V-ийн зургуудыг их харсан” гэжээ
Nam Bo Ra жирэмсэн байх хугацаандаа V-ийн зургуудыг нэлээд их харж байсан гэж ярьжээ. Энэ нь ээж жирэмсэн байхдаа хэн нэгний зургийг их харвал хүүхэд нь түүнтэй төстэй төрдөг гэх түгээмэл яриатай холбоотой аж.
Түүний ярианд Kim Jong Min хошигнон “Өнөөдөр намайг харсан болохоор одоо зүгээр байх болов уу?” гэж хэлж, студийн уур амьсгалыг инээдтэй болгосон байна.
Nam Bo Ra өнгөрсөн жил олны танил бус найз залуутайгаа гэрлэсэн бөгөөд одоо хосууд анхны хүүхдээ өлгийдөн авахаар бэлтгэж байна.
