Японы алдарт зохиолч хорт хавдрын улмаас нас барсан гэж мэдээлэв
Японы нэрт зохиолч Хигашино Кэйго хорт хавдрын улмаас 68 насандаа таалал төгссөн талаар түүний бүтээлүүдийг хэвлэн нийтлэгчид мэдээлжээ. Тэрээр энэ сарын 23-нд нас барсан байна.
Детектив, адал явдалт зохиолын төрлөөр дэлхий даяар танигдсан Хигашино Кэйго нь Японы орчин үеийн уран зохиолын хамгийн нэр хүндтэй төлөөлөгчдийн нэг байв.
Инженерээс алдарт зохиолч болсон замнал
Хигашино Кэйго 1958 оны хоёрдугаар сарын 4-нд Японы Осака мужид төржээ. Тэрээр төрөлх мужийнхаа их сургуулийг инженер мэргэжлээр төгссөн байна.
Зохиолчийн гараагаа 1985 онд, 27 настайдаа эхлүүлсэн. Тухайн үед тэрээр мэргэжлээрээ ажиллаж байхдаа “Хокаго” буюу “Хичээлийн дараа” романаа бичсэн бөгөөд уг бүтээл нь түүнийг уран зохиолын ертөнцөд хүчтэй гаргаж иржээ.
Энэхүү роман нь Японы адал явдалт зохиолын нэрт төлөөлөгч Эдогава Рампогийн нэрэмжит шагналыг хүртсэнээр Хигашино Кэйгогийн нэр уншигчдын дунд хурдан түгсэн байна.
“Мөрдөгч Галилей” цуврал түүнийг дэлхийд таниулсан
Хигашино Кэйго олон арван адал явдалт, детектив зохиол туурвиснаараа алдартай. Түүний хамгийн танигдсан бүтээлүүдийн нэг нь 1998 онд анх хэвлэгдсэн “Мөрдөгч Галилей” цуврал юм.
Уг цувралын гол дүр нь суут физикч бөгөөд шинжлэх ухааны мэдлэг, логик сэтгэлгээг ашиглан гэмт хэргийг илрүүлдэг. Энэ өвөрмөц зохиомж нь уншигчдын сонирхлыг татаж, зохиолчийн нэр хүндийг улам өсгөжээ.
Тус цувралын “Сэжигтэн X-ийн үнэнч байдал” буюу “Сэжигтэн X-ийн золиос” нэрээр мөн хэвлэгдсэн зохиол нь 2006 онд Японы утга зохиолын нэр хүндтэй Наокигийн шагналыг хүртсэн байна.
Санаанд оромгүй эргэлт, гүн сэтгэл зүйгээрээ ялгардаг байв
Хигашино Кэйго зохиолын үйл явдлыг гэнэтийн эргэлтээр өрнүүлж, уншигчдыг төгсгөл хүртэл таамаглал дунд байлгадаг бичлэгийн арга барилаараа алдартай байлаа.
Мөн тэрээр зөвхөн гэмт хэрэг, мөрдлөгийг дүрслээд зогсохгүй дүрүүдийн дотоод ертөнц, сэтгэл зүйн зөрчил, хүний сонголт, гэм буруу, хайрын тухай нарийн мэдрэмжтэй өгүүлдэг зохиолч гэж үнэлэгддэг.
106 ном туурвиж, бүтээлүүд нь дэлхийн 41 оронд орчуулагджээ
Түүний бестселлер бүтээлүүдийн дунд “Шөнө дундын наран доорх зугаалга” буюу “Шөнө дундын нар”, “Мөрдөгч Кага” цуврал, “Багт наадам” цуврал зэрэг олон алдартай зохиол багтдаг.
Хэвлэн нийтлэгчдийн мэдээлснээр, Хигашино Кэйго нийт 106 ном туурвисан байна. Түүний хамгийн сүүлчийн бүтээл ирэх наймдугаар сарын 5-нд хэвлэгдэхээр төлөвлөгджээ.
Зохиолчийн бүтээлүүд зөвхөн Японд гэхэд 109 сая орчим хувь хэвлэгдсэн бөгөөд дэлхийн 41 улс, бүс нутагт орчуулагдан уншигчдын хүртээл болсон байна.
Детектив зохиолын ертөнцөд том гарз тохиолоо
Хигашино Кэйгогийн зохиолууд Японы төдийгүй олон улсын уншигчдын дунд олон жилийн турш өндөр үнэлэгдэж ирсэн. Түүний бүтээлүүд кино, телевизийн цуврал болон тайзны бүтээл болон дахин амилж, детектив жанрын хүрээг өргөжүүлсэн юм.
Түүний таалал төгссөн тухай мэдээлэл Японы утга зохиол, дэлхийн детектив зохиолын ертөнцөд том гарз болж байна.
