Өмнөд Солонгосын Соёл, спорт, аялал жуулчлалын яам болон тус улсын Аялал жуулчлалын байгууллага дэлхийн хамгийн том стриминг платформ болох Netflix компанитай хамтран шинэлэг сурталчилгааны кампанит ажил хэрэгжүүлж эхэлжээ. Энэхүү хамтын ажиллагаа нь Солонгосын соёл, контентод дурлагч сая сая үзэгчдийг тус улсад зорчих сэдэл төрүүлэх зорилготой юм.
Кампанит ажлын хүрээнд “Squid Game” цувралаас сэдэвлэсэн аялал жуулчлалын видео сурталчилгаа бэлтгэгдэж байгаа бөгөөд үүнийг Netflix хэрэглэгчдэд зориулан хүргэхээр төлөвлөсөн байна. Мөн энэхүү сурталчилгаа дагалдан “Ягаан хамгаалагчдын дагалдан Солонгост хийх ВИП аялал” нэртэй урамшуулалт арга хэмжээ зохион байгуулагдаж, ялагч нь Өмнөд Солонгос руу аялах эрхийн эзэн болох юм.
Сурталчилгааны агуулгуудыг Солонгосын Аялал жуулчлалын байгууллагын албан ёсны YouTube суваг болох “Imagine Your Korea”-аас шууд үзэх боломжтой бөгөөд тус платформоор дамжуулан Солонгосын байгаль, хот, түүх соёлыг олон улсад сурталчилж байна.
Netflix-ийн хэрэглэгчдийн 72 хувь нь Солонгос контент үзсэний дараа тус улсад зорчих хүсэлтэй болсноо илэрхийлсэн нь энэхүү стратегийн ач холбогдлыг улам тодотгож байна. Дэлхий даяар 300 сая гаруй захиалагчтай Netflix компани ийнхүү Өмнөд Солонгосын аялал жуулчлал, соёлын экспортын нэг чухал хэрэгсэл болж байна.
