TWICE-ийн Nayeon Сөүлийн Cheongdam-д 9.5 тэрбум воны үл хөдлөх хөрөнгө авчээ

TWICE хамтлагийн гишүүн Nayeon Сөүл хотын Cheongdam дүүрэгт газар болон барилга худалдан авсан нь олны анхаарлыг татаж байна. Үл хөдлөх хөрөнгийн салбарын эх сурвалж болон албан бүртгэлийн мэдээллээр тэрээр уг хөрөнгийг 9.5 тэрбум воноор буюу ойролцоогоор 6.9 сая ам.доллараар авсан байна.

Наймдугаар сарын 28-нд мэдээлснээр, Nayeon Cheongdam дүүрэгт байрлах тухайн газар, барилгыг худалдан авах гэрээг тавдугаар сарын 3-нд байгуулжээ. Харин өмчлөх эрхийн шилжүүлэг энэ сарын 24-нд бүрэн хийгдсэн байна. Мөн уг үл хөдлөх хөрөнгөнд дээд тал нь 10.2 тэрбум воны буюу 7.4 сая ам.долларын өрийн хязгаартай барьцаа бүртгэгджээ.

Тус барилга нь хуучны хийцтэй бөгөөд нэг зоорийн давхар, газрын дээрх хоёр давхартай аж. 2010 онд өргөтгөл хийсний дараа нийт талбай нь 218.87 ам метр болсон байна. Үүнээс нэгдүгээр давхар 105.38 ам метр, хоёрдугаар давхар 73.31 ам метр, зоорийн давхар 40.18 ам метр талбайтай юм.

Саяхан уг барилгын зориулалтыг орон сууц болон ойр орчмын үйлчилгээний байгууламжаас зөвхөн ойр орчмын үйлчилгээний байгууламж болгон өөрчилсөн байна. Хоёр замтай булангийн байршилд оршдог учраас компанийн төв байр, худалдаа үйлчилгээний зориулалтаар ашиглахад давуу талтай гэж үзэж байна.

Салбарын мэргэжилтнүүдийн үзэж буйгаар Nayeon уг хөрөнгийг одоо байгаа барилгаас түрээсийн орлого олох зорилгоор бус, харин газрын үнэ цэнэ болон ирээдүйд шинээр барилга барих боломжийг харгалзан худалдан авсан байх магадлалтай аж.

One Building компанийн ахлах багийн дарга An Hyung Jun энэ талаар:

“Худалдах үнийг газрын талбайд шилжүүлж тооцвол 3.3 ам метр тутамд ойролцоогоор 155 сая вон болж байна” гэж мэдэгджээ.

Тэрээр мөн:

“Барилгын насжилтыг харгалзан үзвэл энэхүү худалдан авалт нь одоо байгаа байгууламжаас илүү газрын үнэ цэнэ болон шинээр барилга барих боломжийг тооцсон шийдвэр байх магадлал өндөр” хэмээн тайлбарласан байна.

An Hyung Jun цааш нь:

“Энэ бүсэд өндөр зэрэглэлийн орон сууцны цогцолборууд, entertainment компаниуд, gallery-нууд, fashion болон luxury чиглэлийн оффисууд нягт байрладаг. Мөн булангийн газар учраас ашиглалтын боломж харьцангуй өндөр” гэж нэмж хэлжээ.

Ийнхүү Nayeon-ийн Cheongdam дахь томоохон худалдан авалт нь зөвхөн оддын үл хөдлөх хөрөнгийн хөрөнгө оруулалт төдийгүй Сөүлийн хамгийн үнэ цэнтэй бүсүүдийн нэг дэх ирээдүйн бүтээн байгуулалтын боломжтой холбоотой шийдвэр байж магадгүй байна.