Их Британийн хошин урлагийн жүжигчин, жүжигчин Рассел Брэндийг Лондонгийн Southwark Crown Court-ийн тангарагтны шүүх хүчин болон бэлгийн хүчирхийлэлтэй холбоотой дөрвөн хэрэгт буруутай гэж үзжээ.
51 настай Брэндийг нэг удаагийн хүчин, гурван удаагийн бэлгийн хүчирхийллийн хэрэгт буруутай гэж тогтоосон бол хүчингийн өөр хоёр хэрэг болон бэлгийн шинжтэй хүчирхийлэл үйлдэхийг завдсан нэг хэрэгт цагаатгасан байна.
Брэнд өөрт нь тулгасан буруутгалуудыг шүүхийн өмнөх болон шүүх хурлын үеэр үгүйсгэж ирсэн. Тэрээр зарим бэлгийн харилцаа харилцан зөвшөөрсөн байсан, харин бусад буруутгал нь зохиомол гэж мэдэгдэж байжээ.
Ялыг ирэх Даваа гарагт сонсоно
“Get Him to the Greek”, “Arthur” зэрэг кинонд тоглосон Брэндийг прокурорууд шүүх хуралдааны үеэр “харгис” бэлгийн хүчирхийлэгч хэмээн тодорхойлсон байна.
Шүүгч Жоэл Беннатан ирэх Даваа гарагт түүнд ял оноохоор товлосон бөгөөд хэдэн жилийн хорих ял авах боломжтой гэж эх сурвалж мэдээлжээ. Шүүхийн шийдвэр гарсны дараа Брэндийг цагдан хорьсон байна.
Лондон хотын цагдаагийн газрын мөрдөн байцаах албаны ахлах ажилтан Энди Фурфи шүүхийн шийдвэрийг:
“өөрт тохиолдсон явдлын талаар ил гарч, мэдэгдсэн эмэгтэйчүүдийн ер бусын зориг, тэсвэр хатуужил, шийдэмгий байдлын баталгаа”
боллоо гэж мэдэгджээ.
Тэр мөн:
“Брэнд өөрийн нөлөө, байр суурь, алдар нэрээ ашиглан эмэгтэйчүүдийг дарамталж, тэдний эсрэг бэлгийн хүчирхийлэл үйлдсэн. Түүний нэр хүнд өсөхийн хэрээр өөрийгөө юу ч хийсэн болно гэж үзэх хандлага нь ч мөн нэмэгдсэн байна”
гэжээ.
Хэргүүд 1999-2009 оны хооронд гарсан гэж прокурорууд үзсэн
Прокурорын талын мэдээлснээр шүүхээр хэлэлцсэн үйл явдлууд 1999-2009 оны хооронд болсон бөгөөд энэ хугацаанд Брэнд жижиг тайзнаас эхэлж, телевизийн хөтлөгч, улмаар Холливүүдийн жүжигчин болж нэр хүнд нь өссөн үе таарч байна.
Шүүх хуралдаанд зургаан эмэгтэйн мэдүүлгийг сонссон бөгөөд тэдний нэрийг насан туршид нь нууцлах эрх зүйн хамгаалалт үйлчилж байгаа аж.
Эдгээр эмэгтэйчүүд бие биеэ танихгүй байсан ч 2023 онд Брэндтэй холбоотой өөр эмэгтэйчүүдийн гомдол, мэдүүлгийг багтаасан телевизийн баримтат бүтээл болон хэвлэлийн нийтлэлүүд гарсны дараа цагдаад ханджээ.
2009 оны хэрэг шийдвэрлэх нотлох баримтын нэг болжээ
Прокуроруудын танилцуулснаар хүчингийн хэрэгт холбоотой хамгийн чухал нотлох баримтуудын нэг нь 2009 онд болсон үйл явдал байжээ.
Хохирогч эмэгтэй Брэндтэй тоглолтынх нь дараа танилцаж, эхний удаад харилцан зөвшөөрсөн бэлгийн харилцаанд орсон гэж мэдүүлсэн байна. Харин хэд хоногийн дараа Брэндийн гэрт дахин уулзах үед зөвшөөрөлгүй бэлгийн халдлага үйлдсэн гэж прокурорт мэдүүлжээ.
Мөн 2004 онд Лондонгийн нэгэн бааранд эмэгтэй хүний биед зөвшөөрөлгүй хүрсэн, 2009 онд сурталчилгааны төсөл дээр хамтран ажиллаж байсан эмэгтэйд бэлгийн шинжтэй халдлага үйлдсэн, 2004-2005 оны үед радио станцад ажиллаж байсан эмэгтэйн биед бусдын нүдэн дээр халдсан гэх хэргүүдэд тангарагтны шүүх түүнийг буруутай гэж үзсэн байна.
Рассел Брэнд нь Америкийн дуучин Кэти Перригийн хуучин нөхөр бөгөөд шүүхийн эцсийн шийтгэлийн хэмжээг ял оноох хурлаар тогтоох юм.
