Жүжигчин, хошин урлагийн уран бүтээлч Рассел Брэндэд холбогдох хүчингийн болон бэлгийн халдлагын хэргийн шүүх хурал Лондонгийн Саутваркийн төв шүүхэд үргэлжилж байна.
Прокурорын тал түүнийг олон жилийн турш бэлгийн харилцаанд хэт улайран ханддаг, хүссэндээ хүрэхийн тулд бусдыг үл тоомсорлодог байсан гэж шүүхэд мэдэгджээ. Харин Брэнд өөрт нь тулгасан бүх хэргийг үгүйсгэж, гэм буруугүй гэж мэдүүлсэн байна.
Түүнд нийт долоон зүйл ангиар ял тулгасны дотор хүчингийн гурван, бэлгийн халдлагын гурван, зохисгүй бэлгийн халдлагын нэг хэрэг багтаж байгаа аж. Эдгээр нь 1999-2009 оны хооронд болсон гэх зургаан эмэгтэйн гомдолтой холбоотой юм.
Прокурор түүнийг “сэтгэл татам атлаа тооцоотой” байсан гэж тодорхойлов
Прокурорын талын өмгөөлөгч Риэл Карми-Жонс шүүхэд Брэндийг хүссэн зүйлээ авахын тулд нөхцөл байдлаас шалтгаалан “сэтгэл татам”, “өршөөлгүй”, “тооцоотой” байж чаддаг байсан гэж тодорхойлжээ.
Тэрээр:
“Тэр хүссэн үедээ эелдэг, хөгжилтэй байж чаддаг байсан. Ямар нэгэн зүйл хүсэж байвал үнэхээр сэтгэл татам, таалагдам хүн болж чадна. Харин дараа нь шаардлага өндөртэй, өөрийгөө бүхнийг хүртэх ёстой мэт боддог, маш их бэлгийн дур хүсэлтэй, хүсэл бүр нь биелэх ёстой мэт хүүхдэрхүү хүлээлттэй болдог байсан”
гэжээ.
Прокурорын мэдэгдсэнээр гомдол гаргасан зургаан эмэгтэй хоорондоо танил биш бөгөөд өмнө нь уулзаж байгаагүй байна.
Тэдний зарим нь 2023 онд “Channel 4” сувгаар гарсан Рассел Брэндийн тухай баримтат нэвтрүүлэг болон түүнтэй холбоотой мөрдөн сурвалжилгын нийтлэлүүдийг үзэж, уншсаны дараа цагдаад ханджээ.
Гомдол гаргасан эмэгтэйчүүдийн нэрийг шүүхийн танхимд дурдсан ч хуулийн дагуу тэдний нэрийг олон нийтэд ил болгохгүй байх хамгаалалт үйлчилж байна.
Зургаан эмэгтэй өөр өөр цаг хугацаанд халдлагад өртсөн гэж мэдүүлжээ
Прокурорын танилцуулснаар нэг эмэгтэй 2009 онд Борнмут хотод болсон Хөдөлмөрийн намын бага хурлын үеэр Брэндтэй танилцсаны дараа хүчирхийлэлд өртсөн гэж мэдүүлсэн байна.
Өмнө нь MTV-д ажиллаж байсан өөр нэг эмэгтэй 2001 онд Брэнд өөрийг нь хүчээр ариун цэврийн өрөө рүү оруулахыг оролдсон гэж гомдол гаргажээ.
Гурав дахь эмэгтэй 2004 онд Лондонгийн нэгэн баарны ариун цэврийн өрөөнд хүчирхийлэлд өртсөн гэж мэдүүлсэн байна.
Өөр нэг гомдол 2004-2005 оны үед “Capital Radio”-гийн байранд болсон гэх бөгөөд тухайн эмэгтэй Брэнд өөрийг нь хүчээр тэвэрч, бүдүүлэг байдлаар үнссэн гэж мэдүүлжээ.
Мөн 2009 онд Брэндийн тоглолтыг үзсэний дараа түүнтэй танилцсан эмэгтэй хүчингийн хэрэгт өртсөн гэж гомдол гаргасан байна.
Эдгээр нь прокурорын талын шүүхэд танилцуулж буй мэдүүлгүүд бөгөөд одоогоор шүүхийн эцсийн шийдвэр гараагүй байна.
Рассел Брэнд бүх харилцаа зөвшөөрөлтэй байсан гэж мэдүүлжээ
Шүүхийн үеэр танилцуулсан мэдээллээр Брэнд цагдаагийн байцаалтын үеэр асуултад дэлгэрэнгүй хариулахаас татгалзаж, урьдчилан бэлтгэсэн мэдэгдэлдээ тулгуурласан байна.
Тэрээр тухайн эмэгтэйчүүдийн заримыг санахгүй, нэрийг нь ч мэдэхгүй гэж мэдэгдээд, бэлгийн харилцаа болсон бол бүгд харилцан зөвшөөрөлтэй байсан гэж тайлбарлажээ.
Брэндийн өмгөөлөгчөөр Иан Уинтер ажиллаж байна.
Шүүхийн тангарагтны бүрэлдэхүүн найман эрэгтэй, дөрвөн эмэгтэйгээс бүрджээ. Шүүгч эхний 50 хүнээс 12 тангарагтныг сонгосон байна.
Рассел Брэндийн тухай өмнө нь гарсан баримтат нэвтрүүлгийг үзсэн, эсвэл “The Times”, “The Sunday Times”-ийн мөрдөн сурвалжилгын нийтлэлийг уншсан хүмүүсийг тангарагтны бүрэлдэхүүнээс хасжээ.
Мөн MTV, “Channel 4”, “Capital Radio”-д ажиллаж байсан хүмүүсийг ч сонгоогүй байна.
Шүүгч тангарагтнуудад Брэндийн талаар интернэт, хайлтын систем болон олон нийтийн сүлжээнээс мэдээлэл хайхыг хатуу хориглосон бөгөөд энэ нь шүүхийн явцад нөлөөлж болзошгүйг анхааруулжээ.
Шүүхэд эхнэрийнхээ хамт ирсэн байна
Рассел Брэнд шүүх хуралд хар судалтай костюм, цагаан зангиатай ирсэн бөгөөд эхнэр Лора нь түүнтэй хамт байжээ.
Брэнд “Forgetting Sarah Marshall”, “Get Him to the Greek”, “Despicable Me” зэрэг кинонуудаар танигдсан. Холливудад ажиллахаасаа өмнө Британийн телевиз, радиогийн нэвтрүүлгүүдэд тогтмол оролцож байсан юм.
Тэрээр өмнө нь дуучин Кэти Перритэй гэрлэж байсан бөгөөд сүүлийн жилүүдэд Христийн шашинд орсноо зарлаж, үзэл бодлын эрх чөлөө болон чөлөөт сэтгэлгээний тухай байр сууриа илэрхийлэх болсон.
Шүүхэд ирэхдээ Брэнд:
“Өнөөдөр би өөрийгөө ерөөлтэй мэт мэдэрч байна. Мэдээж санаа зовж байгаа ч энэ үйл явц бүх оролцогчдод сайн үр дүн авчирна гэж найдаж байна. Энэ бол миний залбирал”
гэж хэлжээ.
Одоогоор шүүхийн ажиллагаа үргэлжилж байгаа бөгөөд Рассел Брэнд бүх зүйл ангийг үгүйсгэж байна.
