Монгол Улсад анх удаа морьт харвааны дэлхийн аварга шалгаруулах тэмцээн зохион байгуулагдана. Энэхүү тэмцээн нь Монголын уламжлалт морьт спортын нэгэн чухал үйл явдал бөгөөд Нүүдэлчин дэлхийн соёлын фестивалийн хүрээнд 2025 оны наймдугаар сарын 22-24-нд Улаанбаатар хотын Налайх дүүрэг, Тайж хайрханы бэлд зохион байгуулагдах гэж байна.
Тэмцээн нь ЮНЕСКО-гийн «Соёлын биет бус өвийг хамгаалах тухай» 2003 оны конвенц болон Монгол Улсын Засгийн газрын 2024 оны 41 дүгээр тогтоол-ын дагуу зохион байгуулагдаж байгаа юм. Энэ нь Монголын морьт спорт, үндэсний өв соёлыг олон улсад сурталчлах, соёл, спортын хамтын ажиллагааг шинэ түвшинд гаргах зорилготой.
Тэмцээнд оролцох улс орнуудын тоо 30 гаруй болж, 170 гаруй шилдэг харваачид оролцохоор төлөвлөгдөж байна. Мөн энэхүү тэмцээн нь Монголын уламжлалт харвааны төрөл болох “Бөмбөг намнаа”-г дэлхийн аваргын албан ёсны төрөлд анх удаа багтаасан нь онцлог юм.
Монголын үндэсний морьт харвааны нэгдсэн холбоо энэ тэмцээнийг зохион байгуулах бөгөөд Монгол Улсаас 15 шилдэг харваач оролцохоос гадна олон улсын зэрэглэлтэй шүүгчид, ЮНЕСКО, Дэлхийн морьт харвааны холбоо-ны удирдлагууд ч хүрэлцэн ирэхээр төлөвлөгдсөн байна.
Тус тэмцээний зохион байгуулалт, ач холбогдол, оролцогч орнууд болон олон улсын хамтын ажиллагааны талаар мэдээлэл өгөх хэвлэлийн бага хурал өчигдөр /2025.06.25/ зохион байгуулагдаж, Монголын үндэсний морьт харвааны нэгдсэн холбооны тэргүүн Н.Даваадорж, Дэлхийн морьт харвааны холбооны тэргүүн Ким Ён Соп, Засгийн газрын хэрэгжүүлэгч агентлаг Соёл, урлагийн газрын дарга Э.Цэнд-Аюуш, Дэлхийн аварга шалгаруулах тэмцээний зохион байгуулах хорооны дарга Ж.Энхбат, Гадаад харилцаа, хамтын ажиллагааны дарга Ц.Эрдэнэцэцэг нар оролцож, тэмцээний ач холбогдол, зохион байгуулалтын талаар дэлгэрэнгүй мэдээлэл өглөө.
