Монголын төрийн уламжлал, ард түмний эв нэгдэл, тусгаар тогтнол, үндэсний бахархлыг илтгэсэн “Алтан Соёмбот Монгол” нэртэй төрийн хүндэтгэлийн концерт Соёлын төв өргөөнд ёслол төгөлдөр болж өндөрлөлөө.
Тоглолтын үеэр монголчуудын нүүдэлчин ахуй, төрт ёсны дархлаа, эх оронч үзэл, түүхэн замнал, төрийн бэлгэдлийн гүн агуулгыг хөгжмийн аялгуу, бүжгийн уран дүрслэлээр тайзнаа амилуулсан нь олны сэтгэлийг хөдөлгөж, сонирхлыг татав. Уламжлалт ахуйн соёл, ёс заншлыг орчин үеийн дэвшилтэт техник, гэрэлтүүлэг, найруулгын шийдэлтэй хослуулсан нь энэхүү тоглолтыг шинэлэг, сэтгэлд хоногшсон бүтээл болгожээ.
“Алтан Соёмбот Монгол” нь энгийн нэг урлагийн тоглолт бус, үндэсний үнэт зүйлсийг олон нийтэд сануулсан, түүх соёлын дархлааг бататгах төрийн хүндэтгэлийн тод илэрхийлэл байлаа. Үзэгчид энэхүү тоглолтыг талархан хүлээн авч, улс үндэстний бахархлыг сэтгэлдээ дахин мэдэрсэн юм.
