Дэлхийн хэмжээний амжилтад хүрсэн “BTS” болон “Tomorrow X Together” (TXT) хамтлагуудыг төрүүлсэн “Hybe” болон түүний охин компани болох “Big Hit Music” цоо шинэ хөвгүүдийн хамтлагийг албан ёсоор танилцуулахаар болсноо мэдэгдлээ. Энэ нь TXT хамтлаг 6 жилийн өмнө тайзнаа гарснаас хойш “Big Hit Music”-ээс анх удаа шинээр бүрдүүлсэн хөвгүүдийн хамтлаг болж байна.
Шинэ хамтлаг нь таван гишүүнтэй бөгөөд:
- Мартин
- Жеймс
- Жухоон
- Сонгхён
- Геонхо
гэсэн бүрэлдэхүүнтэйгээр энэ оны наймдугаар сарын 18-нд албан ёсоор дебютээ хийхээр товложээ.
“Hybe”-ийн зүгээс өгсөн мэдээлэлд дурдсанаар, эдгээр уран бүтээлчид нь зөвхөн дуулж, бүжиглэх чадвараар хязгаарлагдахгүй бөгөөд бүжгийн дэглэлт, жүжиглэл, видео найруулга зэрэг олон ур чадвартай гэдгээрээ онцлогтой. Харин “Big Hit Music”-ийн төлөөлөгчийн хэлснээр:
“Эдгээр таван авьяастан нь хөгжмийн зохиол, бүжгийн дэглэлт, визуал контент зэрэг олон талт уран бүтээлд идэвхтэй оролцдог. Тэд өөрсдийн амьдрал дээр үндэслэн дуу бичиж, өөрсдийн бүтээлээр дамжуулан илэрхийлэх өвөрмөц оролдлоготой. Хамгийн гол нь, тогтсон дүрэм, үүргээр хязгаарлагдах бус харин хамтын ажиллагаанд суурилсан бүтэцтэйгээр ажиллаж байна.”
Шинэ хамтлагийн гишүүд өмнө нь “Hybe”-ийн бусад төслүүдэд чамгүй хувь нэмрээ оруулсан байна. Тухайлбал:
- Мартин нь “TXT”-ийн “Deja Vu”, “Miracle” болон тун удахгүй гарах “Beautiful Strangers” синглд, мөн “Enhypen”-ийн “Outside”, “Le Sserafim”-ийн “Pierrot”, “Illit”-ийн “Magnetic” клипүүдэд тоглож байжээ.
- Жеймс нь “TXT”-ийн “Deja Vu”, “Illit”-ийн “Magnetic”, “Cherish (My Love)”, “Tick-Tack” зэрэг дууны бүжгийн дэглэлтэд оролцсон ба мөн дээрх уран бүтээлүүдийн зохиолыг Мартинтай хамтран бичсэн байна.
Шинэ хамтлагийн албан ёсны нэр болон бусад дэлгэрэнгүй мэдээлэл нь ирэх долоо хоногт олон нийтэд зарлагдах хуваарьтай байгаа бөгөөд фэнүүдийн анхаарлыг татаад байна.
