Японы алдарт “Чөтгөрийн ангууч” мангагаас сэдэвлэсэн анимейшн кино нээлтээ хийсэн эхний гурван хоногтоо Японы киноны зах зээлд хамгийн өндөр орлого цуглуулсан дээд амжилтыг шинэчлэн тогтоосон тухай дистрибьютер компани Мягмар гарагт мэдээллээ.
Тодруулбал, “Demon Slayer: Kimetsu no Yaiba ‘Infinity Castle — Part 1: Akaza Returns” хэмээх шинэ анги өнгөрсөн Баасан гарагаас эхлэн гурван өдрийн дотор 3.84 сая үзэгч татсан бөгөөд 5.52 тэрбум иен буюу ойролцоогоор 37 сая ам.долларын орлого цуглуулжээ гэж “Aniplex Inc” компани мэдээлсэн байна.
“Sony Music Entertainment”-ийн охин компани болох “Aniplex”–ийн мэдээлснээр, уг кино нээлтийн эхний өдрөө 1.64 тэрбум иен, хоёр дахь өдрөө 1.84 тэрбум иен, гурав дахь өдрөө 2.04 тэрбум иенийн орлого цуглуулснаар Японд нээлтийн өдрөөр хамгийн их орлого олсон кино болжээ. Түүнчлэн Ням гарагийн орлогоороо нэг өдрийн хамгийн өндөр орлоготой киноны амжилтыг тогтоосон байна. Даваа гараг хүртэлх дөрвөн хоногийн нийт орлого 7.32 тэрбум иенээс давсан гэж “Aniplex” онцолжээ.
2016-2020 оны хооронд “Shonen Jump” сэтгүүлд долоо хоног бүр цувралаар нийтлэгдсэн энэхүү манга нь эгчээ чөтгөр болсноос хойш түүнийг эдгээх аргыг эрэлхийлж, хүн идэгч чөтгөрүүдтэй тулалддаг өсвөр насны хүү Танжиро Камадогийн түүхийг өгүүлдэг. Уг цувралаас сэдэвлэсэн өмнөх анимейшн кино 2020 онд нээлтээ хийж, Японд 40 тэрбум иенийн орлого цуглуулсан анхны кино болж байв.
1 comment
Танжиро, Незуко хоёрын түүх үргэлжилж байгаад маш их баяртай байна. Infinity Castle-ийн үйл явдал бол манганы хамгийн сэтгэл хөдлөм хэсэг шүү!