Жеймс Камероны домогт “Avatar” цувралын гурав дахь анги болох “Avatar: Fire and Ash” энэ оны 12-р сарын 19-нд дэлхийн кино театруудад нээлтээ хийхээр бэлтгэгдэж байна. Тус кинонд гол эсрэг талын шинэ дүр болох Varang-ийн дүр төрхийг саяхан олон нийтэд танилцууллаа. Уг дүрийг жүжигчин Oona Chaplin бүтээж байгаа бөгөөд тэрээр “Ash” овгийн төлөөлөгч, Jake Sully-ийн шинэ гол дайсан болох юм.
Pandora-гийн шинэ аюул
2009 онд нээлтээ хийсэн анхны “Avatar” кино нь шинжлэх ухааны уран зөгнөлт кино урлагт шинэ чиг хандлага тодорхойлж, дэлхий даяар үзэгчдийг байлдан дагуулж байв. Энэхүү түүх нь Pandora гариг дээр байгаль, хүн төрөлхтөн болон харь гаригийн соёлын хоорондын тэмцэл, ойлголцол, мөргөлдөөнийг харуулдгаараа онцлог. Харин 2022 онд гарсан хоёрдугаар анги “The Way of Water” Metkayina овгийн усан соёлыг харуулсан бол энэ удаад “Fire and Ash” ангид гол дүрүүд болох Jake Sully болон Neytiri нар галт элементтэй холбоотой Ash овгийн эсрэг тэмцэх болно.
Шинэ эсрэг дүрийн дүр төрх
Varang-ийн дүрийг албан ёсны постероор танилцуулсан бөгөөд түүний:
- Толгойд улаан өнгийн чимэг зүүлт
- Нүүрэнд нь галт уулын үнс түрхсэн
- Гартаа гал атгасан ч шатаадаггүй онцгой чадвартай байдал нь илтгэжээ
Энэхүү дүр нь Ash овгийн гишүүн бөгөөд далайн элементтэй уялдаа бүхий Metkayina овгоос ялгаатайгаар галын хүчнээс улбаатай байж болзошгүй хэмээн шинжээчид үзэж байна.
Трейлэр — хараахан албан ёсоор гараагүй
Хэдийгээр киноны трейлэрийг цахим орчинд хэсэгчлэн тарсан боловч удалгүй устгагдсан. Гэсэн хэдий ч Disney-ийн Нью-Йорк дахь хаалттай арга хэмжээний үеэр АНУ-ын зарим хэвлэлийнхэн уг трейлэрийг үзэж, 3D шил шаардлагатай байсан хэмээн онцолжээ. Тэдний хэлж буйгаар кинонд гарч буй Varang-ийн дүр бодит хөдөлгөөн, дэлгэцэн дээрх дүрслэлээрээ постероосоо илүү аймшигтай, сүр хүчтэй харагдаж байв.
Ирээдүйн ангиудын тов
Киноны албан ёсны Twitter хуудаснаас мэдээлснээр:
- “Avatar: Fire and Ash”-ийн трейлэр тун удахгүй албан ёсоор цацагдана.
- 4-р анги 2029 оны 12-р сарын 21-нд
- 5-р анги 2031 оны 12-р сарын 19-нд нээлтээ хийхээр товлогджээ.
Энэ бүхэн “Avatar” цувралын ертөнцийг улам тэлж, шинэ соёл, шинэ антагонистууд, байгаль орчинтой харьцах шинэ хандлагыг үзэгчдэд хүргэх зорилготой юм.
