2025 оны долоодугаар сарын 31-ний өдөр Увс аймагт түүхэн ойн баярыг тохиолдуулан дэлхийн тавцанд Монголыг төлөөлж буй алдарт “The Hu” хамтлаг тоглолтоо толилуулна. Тус тоглолт нь орон нутгийн Төв цэнгэлдэх хүрээлэнд 17:00 цагаас эхлэх бөгөөд Увс аймаг үүсэн байгуулагдсаны 100 жилийн ойн баярын онцлох арга хэмжээний нэг юм.
Уг тоглолт нь нутгийн ард иргэд болон зочид төлөөлөгчдөд зориулсан бөгөөд үндэсний язгуур урлаг, орчин үеийн рок хөгжмийг хослуулсан “The Hu” хамтлагийн өвөрмөц уур амьсгалыг мэдрүүлэх ховор боломжийг олгоно.
Мөн энэ өдөр нийслэл болон бусад аймгуудад дараах соёл, урлагийн үйл ажиллагаа болохоор төлөвлөгджээ:
Нийслэл хотод:
17:00 цагт – “ТОТЕМ ХУН” үндэсний урлагийн тоглолт Хүн театрын тайзнаа.
18:00 цагт – “Цагаан Лавай” чуулгын “NOMADIC LEGEND” өв соёлын тоглолт “Ган Зам” паласт.
“Унаган төрхөөрөө Орос орон” байгалийн зургийн үзэсгэлэн Улаанбаатар зорчигч тээврийн төвийн Баганат танхимд үргэлжилж байна.
Орон нутагт:
Архангай аймаг – Модон барилдааны дэлхийн аварга шалгаруулах 7 дахь удаагийн тэмцээн өнөөдөр эхэлж, наймдугаар сарын 2 хүртэл үргэлжилнэ.
“The Hu” хамтлагийн тоглолт нь Монголын орчин үеийн хөгжмийн соёл, үндэсний бахархлыг илэрхийлсэн түүхэн арга хэмжээ болж, Увс нутгийн баярын уур амьсгалд цог хийморь нэмнэ.
