Оросын рок хөгжмийн домог Виктор Цойгийн амь насыг авсан ослоос хойш өдгөө 35 жил өнгөрөөд байна. 1990 оны наймдугаар сарын 15-нд ердөө 28 настайдаа тэрээр авто осолд орж хорвоог орхисон ч, түүний дуу, түүний нэр өнөөдөр ч амьд хэвээр.
Домог болсон эгэл залуу
Солонгос овог нэртэй, даруухан залууг анх Борис Гребенщиков олж харсан бөгөөд удалгүй шавь нь багшаасаа давж, Оросын хөгжмийн ертөнцөд шинэ эрин авчирсан юм. Цойгийн дуунуудын энгийн хэрнээ үнэн үгс Орос орны мянга мянган залуусын сэтгэлийг доргиож, “Кино” хамтлагийг үеийнхээ хамгийн нөлөөтэй урсгал болгосон билээ.
Дуунууд нь амьд
Түүний дуу өнөөдөр ч цахим орчин, телевиз, радио гээд хаа сайгүй эгшиглэсээр байна. Цойг нас барсан гэдэгт итгэхэд тэр үед ч, одоо ч амаргүй. Хүмүүсийн дунд “Цой амьд” гэх үг домог болон үлдсэн нь учиртай.
Виктор Цойн үгсээс
Амьдралынхаа турш хийж бүтээсэн бүхнээ хөгжимд зориулсан тэрээр олон зүйрлэл, ухаарал үлдээжээ. Зарим нь өнөөдөр ч үеийнхэнд урам зориг өгдөг:
- “Хүмүүс ижилхэн бодож чадахгүй ч нэг нэгнээ ойлгодог байх ёстой. Тэгж байж л хүн гэж нэрлэгдэнэ.”
- “Би юунд ч харамсдаггүй. Амьдрал сонирхолтой байх нь чухал.”
- “Хөгжим бол миний бүх юмаа золиосолж чадах цорын ганц зүйл.”
- “Хэрэв алхсан бол мөр байх ёстой. Хэрэв харанхуй байгаа бол гэрэл байх ёстой.”
- “Би эрх чөлөөтэй хүн. Яагаад гэвэл би бүх насаараа дуртай зүйлээ хийж ирсэн.”
Дурсамжийн үнэ цэнэ
Өнөөдөр Виктор Цой зөвхөн хөгжмийн домог төдийгүй үе үеийн залууст эрх чөлөө, шударга байдал, үнэнч байдлын бэлгэдэл болсоор байна. Түүний богинохон боловч гэгээн амьдрал хүн бүрийг “алхсан бол мөрөө үлдээх” тухай бодоход хүргэдэг билээ.
