Өмнөд Солонгосын алдарт “Seventeen” хамтлагийн гишүүн, дуучин Мингю дахин “Calvin Klein” брэндтэй хамтран ажиллалаа. Тэрээр брэндийн эрэгтэй дотуур хувцас болон өмдний шинэ цуглуулгын сурталчилгаанд оролцсон бөгөөд ердөө 35 секундийн энэхүү бичлэгт өөрийн эрч хүчтэй дүр төрх, брэндийн залуучуудыг чиглэсэн үнэт үзэл санааг тод харуулжээ.
Өмнөх хамтын ажиллагаа
Мингю нь өнгөрсөн жил анх удаа “Calvin Klein”-ийн сурталчилгаанд оролцсон бөгөөд тухайн үедээ “The Hollywood Reporter”-т ярилцлага өгөхдөө:
“Calvin Klein бол нас харгалзахгүйгээр хүн бүрд зориулагдсан брэнд. Гэхдээ энэ брэндийн хүчтэй байр суурийг мэдэхийн хувьд би өөрийгөө тохирох хүн мөн үү, үнэт зүйлсийг нь илэрхийлж чадах болов уу гэж эргэлзэж байсан” хэмээн сэтгэгдлээ хуваалгаж байжээ.
Шинэ цуглуулгын сурталчилгаа
Энэ удаад дуучин залуу өөрийгөө дахин чадварлаг модель гэдгээ нотолж, брэндийн намрын шинэ цуглуулгыг амжилттай танилцууллаа. Сурталчилгаа нь дуу, дүрс, хөгжмийн найруулгыг хослуулсан бөгөөд түүний хөгжмийн карьер, уран бүтээлтэй холбогдсон шинэлэг өнгө аяс шүтэн бишрэгчдийн талархлыг хүлээсэн байна.
