Италийн нэр хүндтэй “Valentino” загварын ордон 1960 онд байгуулагдсанаасаа хойш дэлхий дахинд өндөр үнэлэгдэж ирсэн билээ. Харин одоо тус брэндийн гүйцэтгэх захирлаар Риккардо Беллини томилогдож, тэрбээр энэ оны есдүгээр сарын 1-нээс албан ёсоор ажлаа эхлэх гэж байна гэж WWD мэдээлжээ.
Шинэ удирдлагын өөрчлөлт нь наймдугаар сард албан тушаалаасаа чөлөөлөгдсөн Якопо Вентуринигийн халааг авч байгаа хэрэг юм. Якопо Вентурини нь таван жилийн турш “Valentino”-гийн гүйцэтгэх захирлаар ажилласан бөгөөд хувийн шалтгааны улмаас үүрэгт ажлаа өгсөн байна.
Риккардо Беллини зөвхөн “Valentino”-гийн төдийгүй “Balmain”, “Pal Zileri” болон “Beymen” брэндүүдийн стратегийн хөгжлийг удирдан чиглүүлэхээр болжээ.
“Valentino гэх домог болсон брэндийн нэг хэсэг болж байгаа минь миний хувьд нэр төрийн хэрэг. Тус ордны хувцас загварт оруулсан түүх, бусдаас ялгардаг бүтээлч дуу хоолойтой хосолдог энэ ордонтой хамтран дараагийн түүхээ бүтээхийг тэсэн ядан хүлээж байна”
— Риккардо Беллини
Беллини өмнө нь “Chloé”, “Maison Margiela” зэрэг брэндүүдийн гүйцэтгэх захирлаар ажиллаж байсан туршлагатай. Тэрбээр “Chloé”-д ажиллаж байх хугацаандаа хоёр жилийн дотор брэндийн орлогыг ойролцоогоор 60 хувиар өсгөсөн амжилттай.
