Ирландын нэрт инди-рок хамтлаг “Kodaline” 2025 оны аравдугаар сарын 9-нд олон нийтийн сүлжээгээр дамжуулан тарж байгаагаа албан ёсоор мэдэгдлээ. Тэд “Бид арван гаруй жилийг хамтдаа өнгөрүүлсний эцэст Kodaline-д баяртай гэж хэлэх хүндхэн шийдвэрийг гаргалаа” хэмээн бичлэгийнхээ эхэнд дурдсан байна.
Сүүлчийн цомгоо бичиж байна
Хамтлагийн гишүүд болох Стив Гарриган, Марк Прендергаст, Винни Мэй Жуниор, Жэйсон Боланд нар фэнүүддээ хандан сүүлийн бэлэг болгон тав дахь, мөн хамгийн сүүлчийн цомгоо бичиж байгаагаа мэдэгджээ.
Арван жилийн аялал
2012 онд байгуулагдсан Kodaline нь уянгалаг, сэтгэл хөдлөм аялгуутай рок урсгалаараа дэлхий даяар нэр хүндтэй болсон. “All I Want”, “Brother”, “High Hopes” зэрэг хит уран бүтээлүүд нь хайр, итгэл, урам зориг зэрэг сэдвийг илэрхийлсэн дуу хоолойгоороо сая сая хүний зүрхийг хөдөлгөж ирсэн юм.
“Энэ бол төгсгөл биш, харин шинэ эхлэл”
Хамтлаг мэдэгдлийнхээ төгсгөлд “Энэ бол бидний хувьд төгсгөл биш, харин шинэ эхлэл” гэж хэлснээр ирээдүйд гишүүд бие даасан уран бүтээлээ үргэлжлүүлэх магадлалтайг илтгэв.
