“Хүүхдүүдийнхээ өрөөний үүдэнд хутга барьж зогсдог байсан” гэж Кевин Федерлайн бичжээ
Поп дуучин Бритни Спирсийн экс нөхөр Кевин Федерлайн “You Thought You Knew” нэртэй шинэ дурсамж номондоо хамтын амьдралынхаа үеийн ноцтой үйл явдлуудыг илчилжээ.
Номд бичсэнээр, Бритни хэд хэдэн удаа хүүхдүүдийнхээ унтлагын өрөөний үүдэнд хутга барьж зогсож байсан бөгөөд энэ үед тэдний хөвгүүд сэрээд ээжийгээ харсан гэж Федерлайн өгүүлсэн байна.
“Хөвгүүд сэрэхэд тэр зүгээр л ‘Өө, чи сэрчихсэн үү?’ гэж хэлээд тайлбаргүй буцаад явдаг байсан,” гэж тэр дурсжээ.
Хүү нар нь аавтайгаа амьдарч байна
Бритни, Кевин нар 2004–2007 онд гэрлэж, Шон Престон болон Жейден Жеймс хэмээх хоёр хүүтэй болсон. Одоо хөвгүүд нь аавтайгаа хамт амьдардаг бөгөөд сүүлийн жилүүдэд Бритни болон хүүхдүүдийнх нь хооронд харилцаа тааруу байгаа тухай эх сурвалжууд мэдээлж байна.
Бритни саяхан Жейдентэй уулзсан зургаа Instagram-д нийтэлсэн ч, 2022 онд Жейден Daily Mail-д өгсөн ярилцлагадаа:
“Ээж маань сэтгэцийн хувьд дээрдэх хэрэгтэй. Тэгвэл би дахин уулзмаар байна,” гэж ярьж байжээ.
“#FreeBritney” хөдөлгөөн сөрөг нөлөөтэй байсан гэжээ
Кевин Федерлайн мөн сүүлийн үед Бритнигийн одоогийн нөхцөл байдалд санаа зовниж буйгаа илэрхийлжээ.
“Цаг хугацаа өнгөрч байна. Бүх зүйл буруу тийш эргэж болзошгүй,” гэж тэр хэлсэн байна.
Түүний хэлснээр, #FreeBritney хөдөлгөөн анх дуучинд тус болох зорилготой байсан ч “үнэндээ эсрэгээрээ нөлөөлсөн” гэж үзэж байгаа аж. Тэрээр одоо олон нийтэд хандан:
“Одоо манай хөвгүүдэд та бүхний дэмжлэг хэрэгтэй байна. Энэ бүх зүйл миний хэмжээнээс хэтэрлээ,” хэмээн уриалжээ.
Бритни тайлбар өгөөгүй байна
Одоогоор Бритни Спирс номонд бичигдсэн мэдээлэлд ямар нэгэн хариу өгөөгүй байгаа юм. Кевин Федерлайн номоо 2025 оны аравдугаар сарын 21-нд худалдаанд гаргахаар төлөвлөж байна.
