Дархан-Уул аймагт “Аялгуунд үлдсэн дурсамж” нэртэй хөгжмийн зэмсгийн үзэсгэлэн долоо хоногийн турш олон нийтэд дэлгэгдлээ.
Үзэсгэлэнд аймгийн музейн сан хөмрөгт хадгалагдаж буй үндэсний хөгжмийн зэмсгүүд, мөн Залуучууд театрын тайзнаа эгшиглэж байсан хөгжим, зэмсгүүд багтсан байна.
Үндэсний хөгжмийн өвийг хадгалсан соёлын арга хэмжээ
Монгол үндэстний хөгжмийн урлаг нь эртнээс уламжлагдан ирсэн сэтгэлгээний илэрхийлэл, соёлын биет бус өвийн нэг билээ.
Тус үзэсгэлэн нь уг өв соёлыг түгээн дэлгэрүүлэхийн зэрэгцээ музейн сан хөмрөг дэх үзмэр, эд өлгийн зүйлсийг судалгааны эргэлтэд оруулах зорилгоор зохион байгуулагджээ.
40 төрлийн хөгжим, тайзны өвөрмөц дэглэл
Үзэсгэлэнд нийт 40 орчим төрлийн хөгжмийн зэмсэг дэлгэн үзүүлсэн бөгөөд тэдгээрийн 83 хувь нь үндэсний хөгжим, 17 хувь нь гадаад хөгжмийн зэмсэг байв.
Хөгжмийг гарал үүсэл, бүтэц, хөгжимдөх арга, хийцийн онцлогоор нь ангилан, чавхдаст, үлээвэр, цохивор гэсэн үндсэн гурван төрөлд хуваажээ.
Аймгийн музейн тайлбарлагчийн хэлснээр, үзэсгэлэнд 250 гаруй иргэн зочилж, соёлын үнэт өвтэй биечлэн танилцсан байна.
Үзэгчдийн сэтгэгдэл
Үзэсгэлэнгийн тайз, дэглэлтийн шийдэл уран сайхны орон зайг бүрдүүлж, үзэгчдэд театрчилсан уур амьсгал мэдрүүлсэн нь онцгой байжээ.
Иргэд “Өв соёлоо шинэлэг, сонирхолтой байдлаар харуулж чадсан үзэсгэлэн боллоо” хэмээн сэтгэгдлээ илэрхийлсэн байна.
2 комментария
Үзэсгэлэн их гоё болсон байна, соёл урлагийн сайхан ажил шүү
Боломж гарвал заавал очиж үзмээр байна