Азийн анхны мега хэмжээний дууны төсөл гэгдэж буй “Silk Way Star” шоуны хагас шигшээ шат Астана хотноо амжилттай өндөрлөлөө. Энэхүү төслийн цар хүрээ нь өмнө зохиогдож байсан ямар ч дуун уралдаанаас давж гарсан бөгөөд нийт 12 орны шилдэг уран бүтээлчид оролцож, дэлхий даяарх сая сая үзэгчдийг теле дэлгэцийн өмнө “цавчиж” байна. “Казинформ” агентлагийн онцолсноор энэ удаагийн есдүгээр шат нь тэмцээний хамгийн их эрч хүч, сэтгэл хөдлөл шингэсэн үеийн нэг болжээ.
Азийн долоон хүчирхэг хоолой финалд үлдлээ
Финалын шатанд өрсөлдөх Азийн хамгийн хүчтэй долоон дуу хоолой тодорсон бөгөөд үүнд ALEM (Казахстан), Ясмин Азиз (Малайз), Автандил Абесламидзе (Гүрж), Мишээл Жозеф (Монгол), Жан Хешуан (Хятад), Саро Геворгян (Армени), Мадинабону Адилова (Узбекистан) багтжээ.
Олон улсын шүүгчдийн үнэлж буйгаар, есдүгээр шат нь оролцогчдод хамгийн өндөр шалгуур тавьсан, хамгийн хүнд сорилт байсан байна. Энэ шатанд уран бүтээлчид анх удаа казах дуучид болох 6eluchchi, A.Z., Маржан Арапбаева, Мона Сонгз нартай хамтран дуэт хэлбэрээр тайзан дээр гарч, өөртөө огтхон ч хэвшээгүй шинэ хэв маяг, шинэ зохиомжийг туршиж, хоолойныхоо боломжийг өөр өнцгөөс харуулжээ.
Төв Азийн хөгжмийн ертөнцийг нэгтгэсэн анхны мега төсөл
Хагас шигшээд үлдсэн оролцогчид өөрсдийн уран бүтээл, улс орныхоо алдартай бүтээлүүд, түүнчлэн бүс нутгийн болон дэлхийн түвшинд танигдсан хит дуунуудыг амилуулж, жинхэнэ олон улсын хэмжээний шоу тоглолтуудыг үзэгчдэд толилуулсан юм.
“Silk Way Star” нь Төв Азийн бүс нутагт ийнхүү өргөн цар хүрээтэй уран бүтээлчдийг нэгэн тайзан дор цуглуулсан анхны дууны төсөл болж байна. Түүнд Азербайжан, Армени, Гүрж, Казахстан, Хятад, Киргиз, Малайз, Монгол, Тажикистан, Туркменистан, Узбекистан, Өмнөд Солонгосын дуучид оролцжээ. Оролцогчид нь бүгд олон улсын уралдаан тэмцээнд амжилт гаргасан, эх орондоо алдартай, хөгжмийн сургуулиуд, мэргэжлийн урлагийн байгууллагуудын нэрийн өмнөөс оролцож буй төлөөлөл гэдгээрээ онцлог.
“Silk Way Star” – Төв Азийн шинэ соёлын брэнд
Төсөл эхний шатнуудаасаа л олон соёл, олон улсын хамтын ажиллагааг нэгтгэсэн томоохон медиа бүтээгдэхүүн болон төлөвшиж, бүс нутгийн орнуудын хооронд бүтээлч солилцоо өрнөх өвөрмөц орон зайг бүрдүүлж чаджээ.
Мөн “Silk Way Star” нь сүүлийн жилүүдэд хэрэгжсэн хамгийн зоримог, хамгийн амбицтай хөгжмийн төслүүдийн нэгээр нэрлэгдэж байна. Оролцогч орнууд, олон улсын телевизийн сувгуудаар дамжуулан уг шоуг үзэж буй үзэгчдийн нийлбэр тоо 1 тэрбумаас давсан гэсэн тооцоо гарчээ. Ийм өргөн хүрээний нөлөө, хамрах байдал нь “Silk Way Star”-ыг Төв Азийн шинэхэн соёлын брэндийн хэмжээнд хүргэж, бүс нутгийн зөөлөн хүчний нэгэн илэрхийлэл болоход ихээхэн түлхэц болж байна.
Баку хотоос Улаанбаатарын үзэгчид хүртэл нэгэн ижил хэмнэлд
“Silk Way Star” шоуг Азербайжанд “Space TV”, Тажикистанд “TV Safina”, Киргизэд “Muzyka and Madaniyat”, Монголд “UBS” болон “AIST Global TV”, Узбекистанд “Zor TV”, Гүржид “Georgian Times” сувгуудаар дамжуулан үзэгчдэд хүргэж байна.
Казахстаны хувьд шинэ дугаар бүрийг “Jibek Joly” телевиз бямба гараг бүрийн 20:00 цагт цацдаг. Тэмцээний эцсийн шат энэ сарын 11 дүгээр сарын 22-нд болох бөгөөд “Jibek Joly” сувгаар шууд дамжуулан Казахстан, Азербайжан, Тажикистан, Киргиз, Монголын үзэгчдэд нэгэн зэрэг хүргэхээр төлөвлөжээ.
Ялагчийг үзэгч, шүүгч хамтдаа тодруулна
Азийн энэхүү анхны мега дууны төслийн аваргыг шүүгчдийн үнэлгээ /50 хувь/, үзэгчдийн цахим санал хураалт /50 хувь/-ыг нэгтгэсэн иж бүрэн системээр тодруулах юм. Үзэгчид “silkwaystar.org” цахим хуудсаар орж өөрийн дэмжиж буй оролцогчдоо санал өгөх боломжтой бөгөөд энэ нь төслийн оролцогчдыг бүс нутгийн хязгаараас давж, үнэхээр олон улсын хэмжээнд “сорилтод оруулж” буй хэрэг юм.
“Silk Way Star” шоу нь Казахстаны Ерөнхийлөгчийн Телевиз, радиогийн цогцолбор болон Хятадын Хэвлэл мэдээллийн группийн хооронд байгуулсан “Silk Way Star” олон улсын төслийг бий болгох хамтын ажиллагааны гэрээний хүрээнд хэрэгжиж байна. Ингэснээр зөвхөн хөгжмийн уралдаан бус, улс орнуудын соёлын харилцааг бэхжүүлэх, шинээр тэлэх стратегийн төслийн хэмжээнд хүрээд байна.
