Лабубу дэлгэцнээ амилна: Sony Pictures, Pop Mart шинэ “одоод” төрүүллээ

Хүүхэлдэйн дүрээс бүрэн хэмжээний кино хүртэл

Eaglenews мэдээлснээр «Sony Pictures» болон Хятадын тоглоом, цуглуулгын зах зээлд тэргүүлэгч «Pop Mart» компани хамтран Лабубу дүрийг түшиглэсэн бүрэн хэмжээний хүүхэлдэйн кино хийх тохиролцоонд хүрчээ. Ингэснээр Лабубу нь зөвхөн цуглуулгын хүүхэлдэйгээр бус, албан ёсоор дэлгэцийн бүтээлийн гол дүр болон дэлхий даяарх үзэгчдийн өмнө гарах гэж байна.

«Sony Pictures» зөвхөн кино бүтээхээр хязгаарлагдахгүй, Лабубуг цахим ертөнцөд зориулсан контент, дижитал бүтээгдэхүүн, онлайн хэрэглээний төрөл бүрийн хэлбэрээр хөгжүүлэх төлөвлөгөөгөө мөн илэрхийлжээ. Өөрөөр хэлбэл Лабубу нь кино, анимэйшн, тоглоом, цахим контентын нэгдсэн ертөнц бүхий франчайз болж өсөх сууриа тавьж байна.

Лабубугийн стратегийн дараагийн шат

Харин «Pop Mart»-ын зүгээс энэхүү хамтын ажиллагааг Лабубу брэндийн олон улсын өсөлтийн түлхүүр алхам, шинэ түвшний эхлэл хэмээн тодорхойлж, “Лабубуг зах зээл рүү гаргах стратегийн дараагийн шат” гэж нэрлэжээ. Тэдний үзэж буйгаар Sony-той хамтын ажиллагаа нь кино театрууд, стриминг платформууд, дижитал тоглоом, мерчандайзинг зэрэг олон сувгаар нэгэн зэрэг нэвтрэх боломжийг олгож, Лабубуг дэлхийн поп соёлын идэвхтэй тоглогчдын нэг болгох зорилготой байна.

Ингэснээр анх цөөн тооны цуглуулагч, тусгай зах зээлд танигдаж байсан дүр олон сая үзэгчтэй бүрэн хэмжээний кино болон хувирч, Лабубугийн түүх, зан чанар, ертөнцийг илүү өргөн хүрээнд нээх нөхцөл бүрдэж байна.

Нордикийн үлгэрээс гарч, Азиас дэлхийд түгсэн дүр

Лабубу нь зураач Касин Лунгийн уран сэтгэмжээс төрсөн дүр бөгөөд анх «How2Work» брэндийн дор Зүүн Өмнөд Азийн зах зээлд танилцсан байдаг. Нордикийн үлгэрээс сэдэвлэн бүтээсэн, үлэмж толгой, өвөрмөц төрх, хүүхдийнх шиг хэрнээ бага зэрэг зожиг, нууцлаг араншин бүхий энэ дүр богино хугацаанд цуглуулагчдын сонирхлыг ихээр татсан.

Хожим Лабубу Хятадын зах зээлд албан ёсоор нэвтэрснээс хойш брэндийн эрэлт огцом өсөж, цуглуулгын хүүхэлдэй, хязгаарлагдмал тоотой цувралууд, тусгай эвент, хамтын ажиллагаагаар дамжуулан олон улсын түвшинд танигдсан билээ. Одоо харин тэр телевиз, кино дэлгэц, стриминг платформоор дамжуулан илүү өргөн хүрээний үзэгчтэй “танилцах” гэж байна.

Sony болон Pop Mart-ийн энэхүү хамтын ажиллагаа амжилттай хэрэгжвэл Лабубу нь Дисней, Пиксарын алдартай хүүхэлдэйн дүрүүдийн адил олон үеийн хүүхэд, залуусын дуртай, танил дүрийн нэг болж хувирах боломж нээлттэй харагдаж байна.