Монголчуудын бахархлыг бадраадаг билгийн тооллын онцгой өдөр
Өнөөдөр билгийн тооллын өвлийн тэргүүн сарын шинийн 1, өөрөөр хэлбэл Их эзэн Чингис хаан мэндэлсэн хэмээн тэмдэглэдэг түүхэн өдөр тохиож байна.
“Монгол бахархлын өдөр”-ийг бүх нийтийн амралтын өдөр болгон тэмдэглэдэг болсон нь
Эзэн Богд Чингис хаан мэндэлсний 863 жилийн ойтой давхцаж буй энэ өдрийг Монгол бахархлын өдөр хэмээн нэрлэж, улс даяар өргөн тэмдэглэж байна. Монгол Улсад энэ өдрийг 2012 оноос эхлэн бүх нийтийн амралтын өдөр болгон хуульчилж, жил бүр улс орон даяар ёслол хүндэтгэлийн арга хэмжээнүүд зохион байгуулж иржээ.
Монгол Улсын Ерөнхийлөгчийн 2012 оны нэгдүгээр сарын 9-ний өдрийн 4 дүгээр зарлигаар Чингис хааны мэндэлсэн огноог холбогдох ажлын хэсгийн дүгнэлт, Монгол Улсын Шинжлэх ухааны академийн саналд тулгуурлан билгийн тооллын өвлийн тэргүүн сарын шинийн нэгэн хэмээн албан ёсоор баталгаажуулсан. Үүнтэй зэрэгцэн уг өдрийг “Монгол бахархлын өдөр” болгон улсын хэмжээнд тэмдэглэн өнгөрүүлэхээр шийдвэрлэсэн нь түүх, уламжлал, үндэсний ухамсрыг сэргээх чухал алхам болсон юм.
Үндэсний бахархлыг илтгэх төрийн ёслол, Монгол түмний заншил
Эзэн Богд Чингис хаан мэндэлсний 863 жилийн ой, Монгол бахархлын өдрийг тохиолдуулан эрхэм уншигч та бүхэнд баярын мэндийг дэвшүүлье. Энэ өдөр Монголын нэгдсэн тулгар төрийн бэлгэдэл болсон Их цагаан тугийг цэнгүүлэх төрийн ёслол уламжлал ёсоор зохион байгуулагддаг.
Мөн Их эзэн Чингис хааны хөшөөнд төр, засгийн төлөөлөл болон олон нийт хүндэтгэл үзүүлж, цэцэг өргөн, түүхэн гавьяаг нь дурсдаг. Үүнээс гадна улс даяар соёл, урлаг, спортын олон арга хэмжээ зохион байгуулагддаг ба тэдгээрийн нэг нь чансаа өндөр хүчит бөхийн барилдаан байдаг бөгөөд энэ нь Монгол түмний эв нэгдэл, тэсвэр хатуужил, уламжлалт спортын соёлын нэгэн чухал илэрхийлэл болсоор иржээ.
