Нярайгаа “чимэглэл” болгосон зургаас эхэлсэн маргаан
Жүжигчин И Ши Ён саяхан дөнгөж төрсөн нярай хүүхдийнхээ зургийг цахим хуудсандаа нийтэлснээс үүдэн дахин маргааны голомтод орлоо. Тэрээр өмнө нь ч нярай хүүхдээ гацуур модны чимэглэлийн хайрцагт хийж авхуулсан зураг нийтэлсний улмаас “нярай хүүхдийг тоглоом шиг харьцаж байна” гэх шүүмжлэлд өртөөд байв.
Энэ хүчтэй шүүмжлэлийн дараа И Ши Ён тухайн зургаа аккаунтаасаа устгасан ч, олон нийтийн анхаарлыг дахиад л өдөөх алхам хийж өнгөрсөн сарын 30-нд шинээр авхуулсан зургуудаа дахин нийтэлжээ.
“Зул сарын ил захидал” болсон шинэ зураг ба олны хуваагдал
Шинэ нийтлэлдээ жүжигчин бүсгүй гэр бүлээрээ Зул сарын уур амьсгалтай, боловсруулалттай зураг авхуулсан бөгөөд тайлбар хэсэгтээ:
“Зул сарын баяр манай гэрт ирлээ. Эцэст нь зургийн сүүлийн хувилбар ирлээ. Бид үүрд хадгалж болох зул сарын ил захидал болон зургуудтай боллоо. Маш их баярлалаа”
хэмээн бичжээ.
Гэвч энэ удаагийн зургууд ч интернэт орчинд амар тайван хүлээн авагдсангүй. Нэг хэсэг нь “зүгээр л уран сэтгэмжтэй гэр бүлийн зураг” хэмээн ойлгож, И Ши Ён болон хүүхдэд нь аз жаргал хүссэн сэтгэгдэл үлдээж байхад нөгөө хэсэг нь өмнөх маргааныг сануулж, “нярай хүүхдийг контент, чимэглэл мэт ашиглаж байна” хэмээн дахин шүүмжилж, хэлэлцүүлгийг улам ширүүсгэжээ.
Ийнхүү жүжигчин бүсгүйн Зул сарын зураг олон нийтийг дэмжигчид, үл зөвшөөрөгчид гэсэн хоёр талд хуваах шалтгаан болсон байна.
Гэр бүл салалт, үр шилжүүлэн суулгалт ба өмнөх шуугианууд
И Ши Ён энэ оны гуравдугаар сард нөхрөөсөө албан ёсоор салж буйгаа зарласан бол, долоодугаар сард хоёр дахь хүүхдээ тээж буйгаа олон нийтэд мэдэгдсэн. Тэрээр гэрлэлтээ цуцлуулсан ч хүүхэдтэй болох шийдвэрээсээ ухраагүй бөгөөд үр шилжүүлэн суулгах аргаар жирэмсэн болсон гэдгээ ил болгосон.
Харин хамгийн их маргаан дагуулсан нь экс нөхрийнх нь зөвшөөрөлгүйгээр түүний эсийг ашигласан гэх мэдээлэл байв. Үүнийг олон нийт “ёс зүйн хувьд асуудалтай” хэмээн шүүмжилж, хууль, ёс суртахууны талаас нь нэлээд маргаж байлаа.
И Ши Ён энэ тухайд өмнө нь ярилцлага өгөхдөө, нөхрөөсөө салсан ч хүүхдэдээ эцгийн дүрийн дутууг мэдрүүлэхгүй, өөрөө эцэг, эхийн үүргийг зэрэг гүйцэтгэх болно гэдгээ илэрхийлсэн. Гэсэн ч энэ нь олон нийтийн дунд байр суурийн ялгааг үүсгэсээр байна.
Шинэ төрсөн нярай хүүхдээ Зул сарын “ил захидал” мэт зураг болгон түгээсэн нь ийм маргаантай хувийн түүхийнх нь дараа дахин олны хараанд өртөж, жүжигчин бүсгүйн шийдвэр, хүүхдэдээ хандах хандлагын талаар интернэт хэрэглэгчид дахин маргалдах шалтгаан болж байна.
