CNBC-д өгсөн ярилцлага: сошиал медиа, сэтгэцийн эрүүл мэнд, аавын байр суурь
Дэвид Бекхэм хүү Бруклин Бекхэм нь эцэг эхээ шүүмжилсэн мэдэгдэл хийсний дараа анх удаа олон нийтийн өмнө байр сууриа илэрхийллээ. Тэр нэгдүгээр сарын 20-ны мягмар гарагт CNBC-ийн “Squawk Box” нэвтрүүлэгт оролцохдоо сошиал медиа, түүний сэтгэцийн эрүүл мэндэд үзүүлэх нөлөө, мөн өмнөх өдөр Бруклиний хэлсэн үгний талаар ярив.
Тэрээр сошиал медиаг олон давуу болон сөрөг талтай хосолсон орчин гэж тодорхойлоод, өнөөгийн хүүхдүүд ямар төрлийн контент хүлээн авч байгааг онцолж, эрсдэлтэй тал нь тодорхой байгаа талаар дурдсан. Үүний зэрэгцээ тэр өөрийн хувьд цахим платформыг ашиглахдаа UNICEF-ийн Хүүхдийн сангийн ажилд дэмжлэг үзүүлэх, дэлхий даяарх хүүхдүүдийн тулгамдсан асуудлыг олон нийтэд таниулахад зориулж ирснээ хэлсэн.
“Би сошиал медиа, түүний нөлөөний талаар үргэлж ярьж ирсэн. Сайн тал ч бий, муу тал ч бий. Муу талын тухайд, өнөөгийн хүүхдүүд ямар контентууд хүлээн авч байгааг бид ярьдаг. Энэ нь мэдээж аюултай байх эрсдэлтэй. Гэхдээ би хувьдаа, тэр дундаа хүүхдүүдийнхээ хувьд, сошиалыг зөв зорилгоор ашиглах ёстой гэж боддог. Би өөрийн платформ, дагагчдаа Хүүхдийн сан UNICEF-ийн төлөө ашиглаж чадсан. Энэ нь дэлхий даяар хүүхдүүдэд тулгамдаж буй асуудлыг олон нийтэд таниулах хамгийн хүчтэй хэрэгсэл болсон” гэжээ.
Хүүхдүүдийнхээ алдаанд хандах хандлагаа тодорхойлов
Ярилцлагынхаа үеэр Дэвид Бекхэм эхнэр Виктория Бекхэмтэйгээ хамт өсгөж буй дөрвөн хүүхдээ дурдав. Тэд 26 настай Бруклин, 23 настай Ромео, 20 настай Круз, 14 настай Харпер гэсэн гурван хүү, нэг охинтой.
Тэр эцэг хүн ямар зарчмаар хүүхдүүдээ хүмүүжүүлдэг талаар ярихдаа:
“Би хүүхдүүдээ ч мөн адил хүмүүжүүлэхийг, тэдэнд аливааг ойлгуулахыг хичээсэн. Тэд алдаа гаргадаг. Гэхдээ хүүхдүүд алдаа гаргах эрхтэй. Ингэж байж л тэд суралцдаг. Би хүүхдүүддээ үүнийг л заахыг хичээдэг” гэжээ.
Мөн үргэлжлүүлэн “Заримдаа тэднийг тэр алдааг нь өөрсдөөр нь хийлгэж үзэх хэрэгтэй” хэмээн нэмж хэлсэн нь хүүхдүүдээ хамгаалах, гэхдээ хэт оролцохгүй байж, өөрсдийн туршлагаараа суралцах боломж олгох байр суурийг тодотгов.
Давосын асуултаас зайлсхийсэн нь ба Бруклиний шүүмжлэл
Дэвид Бекхэм саяхан Швейцарын Давос хотноо болсон Дэлхийн эдийн засгийн форумын (WEF) 56 дахь чуулганы үеэр хүүгийнхээ талаар тавигдсан асуултыг шууд хариулахаас зайлсхийж байсан.
Энэ бүхэн нь Бруклин өөрийн болон эхнэр Никола Пелц Бекхэмийн харилцааг санаатайгаар сүйтгэхийг оролдсон, “тоо томшгүй олон худал мэдээлэл тараасан” хэмээн эцэг эхээ буруутгасан мэдэгдлийн дараа өрнөж буй үйл явц юм. Ийм нөхцөлд Дэвид Бекхэм илүү өргөн хүрээний сэдэв болох сошиал медиа, сэтгэцийн эрүүл мэнд, эцэг хүний хандлагынхаа тухай ярьж, хүүгээ шууд шүүмжлэхээс зайлсхийсэн хэдий ч “хүүхдүүд алдаа гаргах эрхтэй” гэсэн байр сууриа онцлон тэмдэглэв.
