Нэгхан долоо хоногт 2 сая үзэлт авч, клипээ кино театраар нээнэ
“YouTube”-т нийтлэгдсэнээс хойш долоо хоногийн дотор хоёр сая гаруй үзэлттэй болсон “Гэгээн” дуу нь реппер ThunderZ-ийн сүүлийн үеийн хамгийн их яригдаж буй уран бүтээл болоод байна. Энэ эрчийг үргэлжлүүлэн тэр “Гэгээн” дууныхаа клипийг 2026 оны 1 дүгээр сарын 23-нд кино театрт албан ёсоор нээхээр болсон талаар мэдэгдэв.
Мөн тэр 2026 оны 5 дугаар сарын 23-нд Төв цэнгэлдэх хүрээлэнд болох “Tengri” нэртэй том хэмжээний тоглолтынхаа талаар дэлгэрэнгүй мэдээлэл өгөхөө мэдэгдсэн байна.
“Монголд анх удаа клипний нээлт кино театрт болно”
ThunderZ өөрийн цахим хуудсаараа дамжуулан “Монголд анх удаа клипны нээлт хийх гэж байна” хэмээн онцолж, олон хүний хүсэлт, саналын дагуу “Гэгээн” клипийг нэг удаагийн хаалттай үзвэр хэлбэрээр том дэлгэц дээр гаргахаар шийдсэнээ мэдээлжээ.
Тэр “Маш олон хүн ийм санал тавьсан тул ганцхан удаа буюу 1.23-нд “Гэгээн” клипээ Corprate-ийн кино танхимд ирсэн хүмүүсдээ үнэ төлбөргүй үзүүлэхээр боллоо” гэж бичсэн байна.
ThunderZ-ийн хэлснээр:
- Үйл ажиллагаа 17:00 цагт эхэлнэ.
- Клип дээр ажилласан уран бүтээлчид, арын багийнхан бүгд ирнэ.
- Улаан хивсний ёслол зохион байгуулна.
Ингэснээр клипний нээлт зөвхөн үзвэр бус, ThunderZ болон бүтээлч багийг үзэгчидтэй нүүр тулан уулзах боломж бүхий эвент болж байна.
“Tengri” тоглолтын хэвлэлийн бага хурал, тасалбарын худалдаа, нууц сюрприз
“Гэгээн” клипний нээлтийн үеэр “Tengri” нэртэй тоглолтын хэвлэлийн бага хурал давхар зохион байгуулагдана. Тэнд тоглолтын концепц, тайз, боломжит зочин уран бүтээлчид болон шоуны цар хүрээний талаар илүү тодорхой мэдээлэл өгөх хүлээлттэй байна.
ThunderZ мөн “Мөн “Тэнгри” тоглолтын хэвлэлийн баг хурал давхар болох бөгөөд тасалбар худалдаа бас байх болно. Мөн нэг surprise бий” хэмээсэн нь фэнүүдийн сонирхлыг улам өдөөж байна. Сюрпризийн талаар урьдчилан дэлгэрэнгүй мэдээлээгүй нь клипний нээлтийн арга хэмжээг илүү сонирхолтой болгох үндэс болж байна.
“Гэгээн” – онлайн хитээс кино театрын дэлгэц рүү
“Гэгээн” дуу нь аль хэдийн “YouTube”-т хэдэн сая үзэлттэй болж, онлайн орчинд хүчтэй байр суурь эзэлсэн. Одоо уг дууны клип том дэлгэц дээр албан ёсны нээлтээ хийсний дараа олон нийтэд бүрэн хувилбараар цацагдах төлөвтэй байна.
Онлайн үзэлт, кино театрын нээлт, мөн “Tengri” тоглолт гурван шугамаар зэрэгцэн явж буй нь ThunderZ-ийн 2026 оны уран бүтээлийн идэвх, өөрийн брэндийг том форматтай эвентээр өргөжүүлэх стратегийг тод харуулж байна.
