Дуучин IU буюу И Жэ Юн хөгжмийн ертөнцөд эргэн ирж буйгаа албан ёсоор зарлалаа. Түүний харьяалагддаг “EDAM Entertainment” агентлагаас түүний шинэ цомгийг тун удахгүй худалдаанд гаргана хэмээн мэдэгдсэн байна.
Тэрбээр энэ оны гуравдугаар сард “When life gives you tangerines” нэртэй 16 ангит киноны гол дүрийг бүтээж, жүжигчин талаараа олон нийтийн хүндэтгэлийг хүлээсэн. Харин энэ удаа уран бүтээлчийнхээ үндсэн чиглэл рүү эргэн орж, шинэхэн цомгоороо фенүүдтэйгээ уулзахаар зэхэж байгаа нь сонсогчдынх нь хувьд баяртай мэдээ болж байна.
Шинэ цомгийн хүрээнд гаргах дууны клип ч энэ сард олон нийтэд хүрэх бөгөөд энэхүү клипт K-pop-ын “Astro” хамтлагийн гишүүн, жүжигчин Ча Ин Ву тоглох нь олны анхаарлыг ихээр татаж байна. Тэдний хамтын уран бүтээл уран сайхны хувьд сонирхолтой, шинэлэг байж мэдэх юм.
IU өмнө нь “Growing up”, “Last fantasy”, “Modern times epilogue”, “Palette”, “Lilac” зэрэг цомгуудаараа өөрийн үнэнч фенүүд болох “Uaena”-гийнхаа хайрыг хүлээж байсан. Түүний шинэ цомог ч мөн адил хүлээлт өндөртэй байгаа бөгөөд уран бүтээлийнх нь дараагийн шатны эхлэл болох хэмээн урлаг сонирхогчид үзэж байна.
